Rakhe ka District Ayush Society ïa ka 12th International Yoga Day ha Nongpoh, snohkti lang u MLA bad MDC

Nongpoh, Jylliew 16: Ka ophis jong ka District Ayush Society, Ri-Bhoi District mynta ka 16 tarik Jylliew kala rakhe ïaka International Day of Yoga kaba 12 ha State Sports Council Nongpoh halor ka phang “Yoga for Health Ageing” ha kaba da ki spah ngut ki samla pule ka Ri Bhoi College bad St. Joseph’s Academy of Nursing, Umtrew kila wan ban shim bynta.
Ha kane ka sngi la sakhi ruh bad pynshngaiñ mynsiem da ka jingdonlang u Bah Mayral Born Syiem MLA ka Nongpoh kum u kongsan haka jingdonlang ka kong Rona Khymdeit MDC, u Dr H Lanong, kiba la hiar madan lang ban shim bynta haka jinglehkai Yoga naka bynta ka koit ka khiah bad ka jingmut jingpyrkhat kaba khlaiñ.
Haba kren ha kane ka sngi u Bah Mayral Born Syiem u la ong ba nalor ka jingbunkam haka jingim kaba man ka sngi kum ki nongrep, ki samla pule, ki riew saiñ pyrthei, bad hala ki jong ki kam ki jam ka long kaba donkam pat ba ngin don ruh ka met kaba koit ba khiah bad ka Yoga kalong kawei naki lynti.
U la ong ruh ba bun naki samla bad ki khynnah kiba dang khie dang san ki pynlut por haki jinglehkai sports bad kumba la ju rakhe ïaka International Yoga Day ka koit ka khiah ka long kaba donkam bad kongsan bha haka jingim u briew bad kane ka lehkai yoga ka sorkar India kala shim ïaka sienjam ban pynthikna ba ki paidbah hapoh ka jingïalam u Myntri Rangbah duh ka ri kin ioh ka met ba koit ba khiah.
Kane ka jinglehkai yoga nalor ba ka wanrah ïaka met kaba koit kaba khiah ka pynlait ruh ïa u briew naki jingmut jingpyrkhat kiba sniew, bad ki jingeh ba ngi ïakynduh man ka sngi haka jingim namar kum u riew saiñ hima sima nga sngewthuh ba ki jingeh ki don man ka sngi naduh ka met ka phat ka bor pyrkhat, hynrei lada ngi smat ban lehkai bad pynlut por ka pynlait na kita ki jingeh ban khlaiñ ruh ka bor met bad ka jingmut jingpyrkhat.