Nongpoh, Nailar 24: Kum shibynta ka jingrakhe ïaka National Sports Day, ka skulbah USTM lem bad ka Ri-Bhoi College Nongpoh, kin sa pynlong ïaka Khelo India Samvaad (Yuva Connect) kaba dei ka prokram kyrpang bala pynlong ha kylleng ki jaka ka ri India ba ki samla kin ïoh ban ïakren bad u Myntri Rangbah haka 27 tarik mynta u bnai.
Ïa ka National Sports day la ju rakhe haka 29 tarik Nailar kum ka dak ka jingkynmaw burom ïaka sngikha jong u nongïalehkai Hockey ba paw ka ri u Major Dhyan Chand, hynrei mynta u snem yn pynlong ïaka prokram ba kyrpang haka 27 tarik Nailar 2026 da ka jingangnud ba ki samla kin ïoh ban shim bynta haka jingïakren bad u Myntri Rangbah duh ka ri bad kumno ban nang kyntiew ïaka kam ïalehkai haka ri.
Ha kane ka sngi ki samla, ki thei bad ki rangïalehkai ba paw ka ri kin ïakynduh lang lyngba katei ka prokram bad la jied ruh 2 tylli ki college man la ka district bad ha Ri-Bhoi District la jied ïaka Ri-Bhoi College bad ka skulbah USTM ban pynlong ïa kane ka prokram.
Kawei na ki jingthmu ba kongsan jong kane ka prokram ka long ban pynpaw ïa ka jingkylla ha ka liang ki kam ïalehkai jong ka ri India ha kine ki 12 snem ba la dep hapoh ka jingïalam jong u Myntri Rangbahduh u Narendra Modi bad, ha kajuh ka por, ban sngap ïa ki jingmut bad ki jingangnud jong ki samla ka ri bad ha kane ka sngi u Myntri Rangbah duh ka rid ala de un sa kren sha kumba 8 lakh ngut ki samla ki ban sa shim bynta haki 1600 tylli ki jaka bapher bapher.
Yn pynlong ïa ka jingïakren ba kyrpang jong ki samla hapdeng ki nongtrei ka MY Bharat bad ki nongïalehkai ba na ka thaiñ bad naka liang ki MP, MLA ne ki myntri sorkar naka jylla kin sa don lang ha katei ka jaka ban ïakren bad ki samla ha kaba kin ïoh ïa ka lad ban ïasam ïa ki jingmut, ki jingai jingmut bad ki jingangnud jong ki na ka bynta ka lawei jong ki jingïalehkai ha India bad ka Viksit Bharat.
