Kyrpad ki bor District ka EJHD ïa ka JCOMSWA ban nym tur sha ophis DC namar ka 163 BNS

Khliehriat, jylliew 15 : Kat kum u kyrwoh khubor ba la phah na ka ophis u Deputy Commissioner ka East Jaiñtia Hills District la ong ba ka la don ka jingthmu kaba na ka liang ka Jaiñtia Coal Owners, Miners, Suppliers & Workers Association (JCOMSWA) ban pynlong ïa ka jingiaid paidbah (Rally) na Ladrymbai Dongwah haduh ha ka Ophis jong U Deputy Commissioner ha ka 16 tarik jylliew, kumta ka bor district ka kyrpad ïa ki nongialam jong ka JCOMSWA ban nym tur paidbah sha ophis jong u DC namar la pyntreikam ïa ki kyndon 163 jong ka Bharatiya Nagarik Suraksha Sanhita, (BNSS), 2023 Dated 20th May, 2026 bad la khang ban ialum paaidbah ha katei ka ophis u DC ha Khliehriat.
“Ka Sorkar jylla ka la shimkhia ïa ka lad ban plie ïa ka jingtih dewïong bad ka Sorkar Pdeng bad kane ka kam ka dang iai bteng haduh mynta ha ryngkat ka jingiatrei lang jong ki trai par dewïong, ki nongshalan nongkhaïi bad kiwei kiwei” ong u kyrwoh.
“Shuh shuh ka ophis jong u Deputy Commissioner ka kwah ban pynshai halor kato ka khubor ba la saphriang ha ki lad pathai khubor kaba ong “Phah ka Ophis DMHO-EJHD da u Doctor Mrad ban exsamin ïa u Bah Marshall ba shah thngan ha Lad Rymbai”. Halor kane ka ophis ka don ban ong ba ha ka 12 tarik u jylliew u Dr F. E. Langstang, A.H. & Veterinary Officer, Khliehriat u la leit ha katei ka jaka ba shah thngan kum u Majistor (Executive Magistrate) kaba long katkum kahukum ne order ba la pynmih da u District Magistrate lyngba ka Order No. EJHD/CON.3/L.O/VOL.I/2025/142 Dated 9th June, 2026”.
Shuh Shuh na ka liang u DMHO, Khliehriat u la pynmih ïa ka roster duty jong ki Doctor (Medical & Health Officers) ban leit peit ïa ka koit ka khiah u Bah Marshall Biam lyngba ka Shithi No. DM&HO/EJHD/MISC-05/2025-26/3175 Dated Khliehriat the 5/6/2026. Te kumta ka jingkynnoh ba phah da u Doctor Mrad ka long kaba bakla bad lamler. Shuh shuh na ka liang jong u General Secretary ka JCOMSWA u la kylli na u Additional Deputy Commissioner, Khliehriat ïa katei ka jingwan u Dr. F.E. Langstang bad la pynshai ia u ba la phah ïa u Dr, F.E. Langstang kum u Majistor (Executive Magistrate) bad u Medical & Health Officer ruh un sa wan tang dep ka training jong u. Ka ophis jong u Deputy Commissioner, Khliehriat ka ban biang ban pynshai ba u Dr. F.E. Langstang, A.H. & Veterinary Officer, Khliehriat u leit duty kum u Majistor (Executive Magistrate) bad udei uwei na ki heh sorkar hapoh District ba lah pynkhamti ïa ka bor kum u Executive Magistrate da ka Law Department” pynkut u kyrwoh.