Shillong, Jylliew 15: Ka pisa kumba T. 39,80,21,333.80 klur kaba dei ka bhah ba la ai kyrpang na ka bynta kiba sam khaw rashon ka la sahkut naduh u snem 2016 haduh u snem 2024.
Ïa kane la ïathuh da ka General Secretary ka Meghalaya Fair Price Shop Dealers Association ka Kong Sarlinda Kharlukhi haba kren sha ki lad pathai khubor ha ka sngi nyngkong.
Ka Kong Kharlukhi kaba long dkhot ruh hapoh ka All India Fair Price Shop Dealers Federation ka la ïathuh ba ka la wad jingtip la slem halor ki subsidy kiba dangsah kiba la dei ban siew sha kiba sam khaw rashon kaba long kum ka bhah kaba ai jingmyntoi na ka Sorkar Pdeng, hynrei katei ka pisa kaba la bun bha naduh u snem 2016 ka la sahkut ym tip na kaei ka daw.
Kumta ka la kyrpad ïa ka Sorkar jylla, lyngba u Myntri ka Tnat Food and Civil Supply ba un shim khia ban ïakren bad ka Tnat Sorkar Pdeng kaba dei ban khmih ïa kane ka kam ban pynkloi ban pynlait noh ïa katei ka pisa kaba sah ka ban long ka jingmyntoi ïa baroh kiba sam khaw ha ka jylla, khamtam sha ki thaiñ nongkyndong kiba hap pynlut bun ka pisa halor u khaw rashon.
Haba kylli, ka Kong Kharlukhi ka la ïathuh ba na ka liang jong ka, kam lah satia ban batai la katei ka pisa ka sorkar pdeng ka ladep ban pynlait ne ban phah sha ka sorkar jylla ne kam kwah satia ban kynnoh la ïa katei ka pisa la pyndonkam bakla ne ba la pyndonkam na ka bynta kawei pat ka jingthmu, hynrei na ka liang jong ka, ka la kyntu ïa ka sorkar ba kan shimkhia ban pynïoh ïa katei ka bhah kaba dei hok ka jong ki naba ka la don mynta la bun bun snem kaba ki khlem ïoh ïa katei ka bhah pisa jong ka sorkar pdeng.
“Nga la shim khia bha ïa kane ka kam naba kadei kaba kongsan bad nga ngeit ba ki don bun ruh kiba sam khaw kim tip ïa kane ka bhah kaba dei hok ka jong ki bad nga ïathuh ïa ki ba kin ym duh ïa kane ka pisa lada ka sorkar jylla ka lah ban shim khia,” ong ka kong Kharlukhi.
