Thung ka sorkar ïa u Lieutenant General Dhiraj Seth kum u khliehduh ki shipai khyndew ka ri India

Shillong, Jylliew 14: Ka sorkar ka la thung ïa u Lieutenant General Dhiraj Seth, PVSM, UYSM, AVSM, uba la bat mynshuwa ïa ka kam kum u Vice Chief jong ki shipai, mynta kum u khliehduh ban wan jong ki shipai khyndew naduh ka 30 tarik, Jylliew 2026. Katba u khliehduh jong ki shipai, u Upendra Dwivedi, PVSM, AVSM un shongthait na ka kam ha kane kajuh ka sngi.
Haba phai shaphang jong u Lieutenant General Dhiraj Seth, u dei uba la pule ha National Defence Academy, Khadakwasla bad u la don ha Armoured Corps ha u Naiwieng 1986.
Ha ka kam kaba u la trei mynta la don sawphew snem, hynrei u don ka jingsngewthuh bad ka jingtip kaba jylliew ha kaba ïadei bad ka pyntylli, ka thong jngai, ka pynjanai ïa ka bor, bad ka pynïaid pyrkhat. Kane ka la kyntiew shibun ïa ka bor ïaleh thma bad ka jingkylla thymmai jong ka Indian Army.
Une u shipai rangbah u la trei ha bun jaka bad ki kynthup ïa ka kam ha Armoured Regiment ha ki jaka shyiap, u la long kum u Armoured Brigade ha Western Theatre bad u la ïakhun thma ruh ha Jammu & Kashmir.
Kum u Lieutenant General, u la pynïaid ïa ka Sudarshan Chakra Corps, kawei na ki kynhun ïaleh thma kiba kongsan eh jong ka Indian Army.
U la bat ïa ka kam ruh kum u General Officer Commanding, ha nongbah Delhi, da kaba khmih bniah ïa ki kam shipai ka ri bad ki ri nongwei, ryngkat ka bynta ban pynlong ïa ki prokram ha ka por kaba la buh.
Ha ka por jong ka Army Commander, une u ophisar u la bat ïa ka kam ban hukum ïa ka thaiñ shatei sepngi bad ka lam shatei, ha kaba u la ïoh ban hukum ïa ar tylli ki jinghukum shipai ne Army Commands bad u la pynïaid ïa ki bynta jong ka kam ba kongsan tam palat ar snem shiteng.
U la bat ïa ki kyrdan ne ki kam ba kongsan bad ba kynthup lang ïa ki nongïarap ba pawkhmat kiba la pynkylla bad ktah jur ïa ka rukom pynkhreh kam, ka jingpynïaid ïa ka kynhun ki shipai bad ka jingpynïoh bor thymmai ïa ka sap ka phong.
Une u shipai u la pawnam na ka bynta ka jingnoh met bad mynsiem jong u ïa ka kam shipai, ha kaba une u ophisar General u la bat ïa ki kyrdan bad ki kam kiba donkam tam hapoh ka ophis pdeng ki shipai, kiba dei peit ïa ka thmu lypa ïa ka lawei ka ïada ri bad ka pynbha ne pynïoh ïa ki tiar ki tar bad ki bor kiba thymmai, da kaba pynwandur ïa ka roi ka par bad kiwei kiwei.
Ki jingnoh synniang jong u ki la long kiba kongsan ban pynbeit ïa ki jingdonkam ha ka kam bad ki teknoloji ba paw thymmei bad ki jingdawa ne ki kyndon jong ka thma ha ka lawei.
Kum u shipai, u Lieutenant General Dhiraj Seth u la pyndep ïa ka jingpule ha ka kam shipai, da kaba ïoh bat ïa ka kyrdan ba nyngkong ha ki lad jinghikai.
U la pyndep ïa ka jingpule jong ka kyrdan Bachelor of Arts ha ka Higher Command Course bad National Defence College bad u la ïadon bynta ha ka jinghikai ba don burom jong ka Command bad Staff Course ha Paris, da kaba pyni ïa ka jingpyrkhat jngai ne jingïohi jngai jong u bad ka jingsngewthuh ïa ki kam ïakhun thma kiba mynta.