California, Jylliew 13: Ki ar kol jong u Folarin Balogun (31 & 45+5’) ka la ïarap ïa ka USA ban pynskhem ïa ka jingjop da 4-1 pyrshah ïa ka Paraguay ha ka jingïalehkai sdang jong ka Group-D ha ka FIFA World Cup 2026 ha Sofi Stadium ha California.
Ka USA ka la lamkhmat tang hadien hynñiew minit na ka jingbakla u rangïalehkai pdeng ka Paraguay u Damian Bobadilla, uba la kynjat khlem da thmu ïa ka bol sha la ka jong ka kol katba u dang pyrshang ban khanglad ïa ka bol ba la pashat da u Weston McKennie.
Ka jingïoh pynkhihjar dang kloi ka la nang aibor ïa ka USA ba kan bteng ban ñion ïa ka liang pyrshah, ha kaba ka Paraguay kam shym la lah ban tehlakam ïa ki jingma ba la wanrah da ka kynhun ïalehkai jong ka USA kaba la thep biang sa ar kol lyngba u Balogun shuwa ban jam sha ka por shongthait.
U Christian Pulisic u la shah bujli noh da u coach u Mauricio Pochettino bad ka USA kam shym la lah ban pynbud ïa ka jingthep kol jong ka hapoh ki 45 minit jong ka kylla miet.
U Mauricio u la pynduna ïa ka kol lamkhmat da kaba pynkhihjar ha ka minit kaba 74 hynrei ka Paraguay kam shym la lah ban pynbor ïalade sha ka jingwanphai kaba la jwat ban pynurlong.
U Giovanni Reyna u la bynrap ïa ka kol kaba saw ha ki minit pynjlan ba khatduh (90+8’) shuwa ban kut ka jingïalehkai ban pynthikna ïa ki lai point na ka bynta ka kynhun u Mauricio Pochettino.
Ka USA ka la kiew shipor sha ka kyrdan ba ha khlieh duh jong ka Group D hashwa ka jingïakhun jong ka Turkiye pyrshah ïa ka Australia ban long mynta ka step Sngi U Blei.
Ha kawei pat ka jaka, ka Canada, kawei naki ri ba pynlong lang ïa ka lympung, ka la ïoh ban khur ïa ka poiñ ba nyngkong eh jong ka ha ka FIFA World Cup hadien ba u Cyle Larin u la pynkhihjar ha ki minit ba khatduh kaba la pynïakhaid da mar 1-1 pyrshah ïa ka Bosnia & Herzegovina ha ka jingïakhun ba sdang jong ka Group B ha Toronto hynne ka step sngi Saitjaiñ.
Ka Bosnia & Herzegovina ka la ïalehkai bha bad tehlakam ïa baroh kawei ka jingïakhun jong ka kylla step, da kaba lamkhmat lyngba ka kol jong u Jovo Lukic (21’) hynrei u Larin u la ïoh lad ban pynïakhaid ha ka minit kaba 78 na ka bynta ka Canada.
Ka jingïakhaid ka ai ïa ka Canada ïa ka point kaba kordor ban sdang ïa ka jingïalehkai jong ka ha ka World Cup bad ka ai mynsiem ïa ka kynhun shuwa ki jingïalehkai jong ka Group B kiba dang sah.
