Ka jingpynïeng ïa u Dr. Nonglait ka dei ka jingai jingmut na ki Unit jong ka seng: Bah Sniawbhalang

Shillong, Jylliew 11: U National vice president ka National People Party (NPP) uba dei ruh u myntri rangbah ka jylla u Bah Sniawbhalang Dhar ha ka sngi Palei u la pynpaw ïa ka jingngeit ba skhem ba ka party kan jop ïa ka elekshon MP shiteng samoi ban wan, da kaba ai burom ïa ki nongtrei kiba rit (grassroots) kiba la tei ïa ka bor ha kylleng ka jylla Meghalaya.
Haba kren sha ki nongthoh khubor, u Bah Dhar u la ong, “Ngi sngewskhem bha ban jop ha kane ka kynti da ka jingkyrshan jong ki paidbah jong ngi.Na ka liang jong ka party, ngi hap ban trei shitom.Nga ai khublei ïa baroh ki unit ha ki kyrdan bapher bapher ha kylleng ki constituency.Ki unit jong ka NPP ki la trei shitom bha. Kumta, ka dei ka dak kaba bha na ka bynta ka election shiteng samoi ka ban wan.”
Halor ki jingkylli halor ka jingbym buh kyrtong kynthei, u Bah Dhar u la ïada ïa ka rukom jied kyrtong jong ka NPP.U la ong ba ïa kane ka rai la shim hadien ba la pan jingmut na ki party unit ha kylleng ka jylla. “Kata phi lah ban kylli na ki.Na ka bynta ka NPP, ngim ju rai na jrong.Ngi ju sngap beit ïa ki jingai jingmut bad ki jingai jingmut na baroh ki unit jong ki 36 tylli ki constituency, ki la ai jingmynjur ïa u Dr DRL Nonglait bad ngi hap ban pdiang ïa kata”, u la ong.
U Bah Dhar u la kynthoh ruh halor ki khubor ba dang shen ba ki nongkyrshan jong ka VPP ki la leit ban kynshan sha ka NPP, khamtam ha ka thain Khasi-Jaintia.
“Hooid, nga la ïohi ïa kata.Khamtam ha ri lum Jaiñtia, ki la hiar haduh katta katta, wat ha ri lum Khasi ruh, man la ka sngi ki jingkheiñ ki nang hiar ha kylleng ka thaiñ Khasi-Jaiñtia kumba ki briew ki nang ban sngewthuh,” u la bynrap.