Shillong, Jylliew 11: Ka jingïalang kaba 84th ka State Executive Committee jong ka Meghalaya Bharat Scouts and Guides la pynlong ha ka sngi Palei hapoh ka P J Bazeley Auditorium Hall bad ïa kane ka jingïalang la pynïaid hapoh ka jinglong Chairman u Vijay Kumar Mantri u IAS Commissioner & Secretary ka tnat Pule puthi.
Ha kane ka jingïalang la aiti ha u ïa ka Warrant of Appointment ban long kum u State Chief Commissioner ka State Association da u State Secretary bad u Vice President barim u Bah W. Lyngdoh. Shuh shuh ka State Commissioner (Guides) kaba la shah thung thymmai ka Cathleen Pyngrope, bad State Commissioner (Adult Resources) ka Wiless Gayang, ki la ïohpdiang ïa ki Warrants of Appointment ba kin treikam hapoh ka State Association.
Kane ka Committee ka la ïakren ïa kiba bun ki mat kiba kongsan bad pynleit jingmut ïa ki jingshim ki rai bad ki rukom treikam ba la pynwandur ïa ki kam kiba long ka jingmyntoi ïa ki samla jong ka jylla.
U Chairperson ha ka jingkren, u la banjur ïa baroh ki dkhot ba kin ïatreilang bad ban ïadon bynta bun ki kam kiba thymmai kiba ym tang ba kin khring ïa ki hynrei ba kin long ka jingai mynsiem ïa ki samla kiba long ka pateng ban wan bad kin ïasoh bad kane ka jingthmu.
