Buhthong ka NPP ïa 2047 kum u snem ban ïohi kum ka lynti sha ka jingpahuh pahai bad dap kyrhai ka NE

Shillong, Jylliew 9 : Ka National People’s Party (NPP) ka la buh thong ïa u snem 2047 kum u snem ban ïohi ïa ka khyrdop lynti ïaid sha ka jingpahuh pahai bad dap kyrhai kane ka thaiñ shatei Lam Mihngi ka ri India. ïa kane ka rai la shim da ka NPP ha ka jingïalang jongka National Executive Committe (NEC) bad Annual Genral Meeting kaba la long ha ka 8 tarik Lah Sngi U Blei ha Orchid, Mawdiang diang, Shillong, hapoh ka jingïalam jong u National President ka Party bad Myntri Rangbah ka jylla u Conrad K Sangma.
Haba kren u la ong ba kane ka thaiñ ka dei ban long ka lawei jongka ri India ha ka liang ka ïoh ka kot, ka khaïi pateng bad ka roi ka par da kaba pyntreikam ruh ïa baroh ki polisi treikam.
Ha kane ka jingïalang la ïakren sani bha ruh halor ki lynti ïaid ka party ha ka kam saiñ pyrthei, kumno ban dang pynkhlaiñ ïa ka party bad ki buit treikam na ka bynta ki election ha kane ka thaiñ bad shabar kane ka thaiñ ruh kumjuh.
Ka jingïalang ka la shim ruh shibun ki rai kiba ïadei bad ka jingpyndon bynta lang ïa ki paidbah ha ka kam synshar khadar ha kane ka thaiñ, ban ïada ïa ki hok jong ki riewlum trai ri, ban pynsted ïa ki kam pynroi pynpar ban poi sha katei ka thong ba la buh 2047.
La rai ruh ban shim khia bha ïa ki nongrim ba ka party ka ïeng bad u Conrad u la ong ba kine ki rai ba la shim baroh ki pynpaw ïa ka jingaiti ka NPP na ka bynta ban synshar hok ïa ki paidbah.
“ Ki rai kiba ngi la shim ki pynpaw ïa ka jingaiti ka party na ka bynta ban shakri hok ïa ki paidbah. Man la ki rai ba la shim ki dei beit halor ki nongrim treikam ka party kata ban shakri ïa ki paidbah. Kane ka dei ka nongrim ba ka party ka ïohi jngai na ka bynta ka roi ka par bad ka jingkiew ha baroh ki liang” ong u Conrad.
U la ong ruh ba kane ka thaiñ ka long kum ka khyrdop lynti ïaid sha ki jingkylla ka khaïi pateng bad ka ïoh ka kot jongka ri. “Kane ka thaiñ ka long ruh kum ka phang pdeng jongka lawei jong ka ri India. Da ka jingpyntreikam ïa ki polisi kiba biang bad ki kam pynroi pynpar kane ka thaiñ kan long kum ka khyrdop lynti ïaid ban poi sha ka thong jongka jingpahuh pahai bad dap kyrhai ym tang jong kane ka thaiñ hynrei ka ri hi baroh kawei” ong u Conrad.