90 na ka 100 la pyndep ïa ka Multipurpose Indoor Hall ha Mawthengkut

Nongstoiñ, Jylliew 09: Hadien kumba shi snem ei ei ba la ïohi ha ki lad pathai khubor, ïa ka jingbuh mawnongrim da u bah Methodius Dkhar myntri sorkar ka jylla Meghalaya ryngkat u myntri rangbah, na ka bynta ban tei ïa ka Multipurpose Indoor Hall jong ka Mawthengkut, mynta ka kynti katei ka Hall ka la dep ban ïeng kynjriang, kaba da shu peit la I kumba ym slem shuh ban satang ban ïoh pyndonkam noh ïa ka.
Katei ka Multipurpose Indoor Hall (2 Court) kaba la mang tyngka haduh 2 klur 78 lak tam ei ei, la tei ha ka shnong Mawthengkut bad la ïohi ka la jan dep lut artad bad ka kam ruh ka dang ïai tyllun ban pyntrei shait shait man la ka sngi. Haba leit ban jngoh hapoh katei ka Hall la ïohi ruh ba naduh ki jaka leit bar ki balcony bad kiwei kiwei ki bynta la dep lut bad la sah ruh satang katto katne ki bynta.
Haba pyrshang ban ïakren bad ki riew rangbah jong katei ka thaiñ kynthup ïa u bah T.Marweiñ kumjuh ruh bad ki samla ba kynthup ïa u samla R.Iawphniaw, ki la ong ba kumba 90 percentage ei ei la dep tei pyndep ïa katei ka Hall.
Kum ki samla ki la shu ap khmih lynti hir hir satang lano ban khap ribbon noh, namar shisien peit wat naduh mynta ruh la I kumba ka la long lada pyndonkam noh lada ka shah ka kam ha kano kano ka por kaba I donkam, namar kaba sah mynta ki don satang ban bteng noh ïa ka bording jingshai ka um bad kiwei kiwei.
Kum ban shu pynkynmaw ba dang shen u samla Marshan Hoffman Ïawphniaw bad u samla Shahkhana Ïawphniaw, ha ka jingïakren bad u nongthoh khubor ki la ong ba katei ka jaka ka dei jong ka seng samla Mawthengkut bad mynshuwa ka don tang kumba 5000 sq ft ei ei.
Hynrei, hadien ba u bah Païa War u ba dei u District Sports Officer barim ka West Khasi Hills District u la synñiang lem da kaba ai da ka jaka kaba kham heh, kat haduh ban da dap biang ïa ka ban shna ïa katei ka Stadium, kumta mynta katei ka jaka ka la don la kumba 1 akar eiei.
Ha kaba ïadei bad kane ka Indoor Stadium ha Mawthengkut, na ka liang ki riew rangbah katei ka thaiñ ki la pynpaw ruh ïa ka jingkmen kaba khraw, da kaba ki la ong ba ka jingdon jong katei ka Hall, kan long ka jingkyrkhu kaba khraw ïa ka thaiñ Mawshynrut hi baroh kawei.
U Bah Wanstrong Nongbri uwei na ki riew rangbah jong katei ka shnong u la ong ba kane ka dei ka jingkyrkhu kaba khraw eh na ka bynta ka dong ka thaiñ baroh kawei. Kine kine baroh ki dei namar ka jingshimkhia bad ka jingtrei shitom jong u MLA ka thaiñ u ba don shisha ka thong ban kyntiew ïa ka thaiñ Mawshynrut baroh kawei.