Nongpoh, Jylliew 09: Uwei u rangbah bym pat lah ban ithuh u la khlad noh na kane ka sla pyrthei ha NEIGRIHMS Hospital hadien ka jingshitom jur naka jingsuba shah tynrah kali ha surok bah National Highway 6 haka thaiñ 13 mer.
Katkum ka jingpyntip u Superintendent of Police ka Ri-Bhoi, la ïathuh ba kane ka jingjia kala jia haka 18 tarik ïaiong 2026 haka por kumba 7:18 baje eiei janmiet ha kaba ki pulit kila ioh jingtip ba kala don ka jingjia aksiden haka thaiñ 13 mer Byrnihat, ha Ri-Bhoi District ha kaba uwei u rangbah bala tip kyrteng kum u Mirajul Rehman u la lap ïa uwei u briew u ba la mynsaw jur bala thiah lyngtar harud surok bala suba ruh ba u la shah tynrah ha ka kali bym ithuh bad kaba la phet krad syndon na katei ka jaka hadien ba dep tynrah. La ioh jingtip ruh ba utei u rangbah u dei u ba la shang makia la kham slem haki thaiñ Byrnihat bad ym don jingtip ïaki bahaiing hasem.
Ïa u tei u rangbah bala mynsaw jur la pynkit noh sha Byrnihat PHC da ka ambulance 108 naka bynta ka jingsumar, hynrei namar ka jingmynsaw kaba la kham jur la pynkit noh sha NEIGRIHMS Hospital Shillong naka bynta ka jingsumar kaba kham paka, hynrei utei u rangbah u la khlad noh haka 5 tarik mynta u bnai Jylliew haka por kumba 12:05 baje eiei mynstep bad ïa ka met jong utei u rangbah la buh ha jaka buh metiap ha NEIGRIHMS Hospital.
Naka liang ki pulit kila pyrshang ban ithuh ïa utei u rangbah bad wad jingtip ïaki bahaiing hasem hynrei ym pat lah ban pynthikna haduh mynta bad ym pat don ba wankam ïa katei ka met.
La antad ruh ba utei u rangbah u dei u ba don haka rta kumba 40-50 snem, u don ka jingjrong kumba 5.2 phut, u phong ruh ka T-shirt kaba blue, bad ka patlun kaba dark blue, la kyrpad ruh kino kino kiba don jingtip ïa une u rangbah kin pyntip sha Police Control Room (PCR) Nongpoh da kaba phone ha u number 9856084514.
