Khot ka ophis SDO Sohra sha ka jingïalang bishar paidbah ban buh dukan kyiad ha Lumkyntung

Shillong, Jylliew 09: Ka ophis jong Sub-Divisional Officer (Excise), Sohra Civil Sub-Division, Sohra, ka la pyntip sha ki paidbah ba ka jingpynlong ïa ka jingbishar paidbah kan long ha kaba ïadei bad ka jingkhot application ba thymmai na ka bynta ka IMFL Retail “OFF” License (Wine Store) ba la ai da u Bah Iarjingmut T. Dkhar uba na Raliang, West Jaintia Hills. Kane ka jingtyrwa ïa ka IMFL Retail “OFF” License la thmu ban buh ha ka shnong Lumkyntung Nongthymmai, East Khasi Hills District. Ha kaba ïadei bad ki kam ki jam ba la buh, la buh ban pynlong ïa ka jingbishar paidbah ka ban long ban pan ïa ki jingai jingmut, ki jingïohi bad ki jingtwat jingmut bad kumjuh ruh ki jingpyrshah na ki nongshong shnong bad ki riew paidbah halor kane ka jingtyrwa ban buh ïa ka dukan kiad.
Ïa kane ka jingbishar paidbah yn pynlong ha ka 16 tarik une u bnai, 2026 ha ka por 1:00 baje nohphai sngi ha Community Hall, Lumkyntung, Laitkroh Sirdarship. Kumta la pynshlur ïa ki nongshong shnong ka shnong Lumkyntuung Nongthymmai bad ki jaka ba marjan ba kin shim bynta ha kane ka jingbishar paidbah kiba long katkum ki rukom treikam ba la buh. La kyntu ïa u Rangbah shnong ka Lumkyntung, bad ki dkhot ka Dorbar Shnong, bad kiwei pat ki nongïalam shnong ba kin pynbna ïar ïa kane ka jingpynbna paidbah hapdeng ki nongshong shnong ban pynthikna ïa ka jingwan poi ryntih jong ki paidbah ban ïashim bynta ha kane ka jingbishar paidbah.
Kane ka jingbishar paidbah kan ai ka lad ïa ki nongshong shnong ban pynpaw ïa ki jingai jingmut ha shwa ban shim ïa ka rai halor kane ka application, ong ka kyrwoh ba la phah da Sub-divisional Public Relations officer Sohra Sub-Division.