Shillong, Jylliew 9 : U Nongïalam ka NPP uba dei ruh u kyrtong mynjur lang jongka sorkar MDA II u James K Sangma un jop khlem jingartatien namar un shah jied khlem nongïaleh pyrshah ban long u MP ka jylla Meghalaya sha ka ïing Dorbar Thawaiñ. Ha ka jingshisha ka jingïajied MP ka dei ban long ha ka 18 tarik hynrei namar ym don ba ïaleh pyrshah ka Election Commission of India kan sa pynbna ba u la jop lypa.
Ka jingpeit bniah ïa ki kot ki sla ban thep kyrteng na ka bynta ka shuki Rajya Sabha jong ka jylla la pynlong ha ka sngi Ba-ar ha ophis treikam jong ka Assembly Secretariat.
U Returning Officer bad u Secretary jong ka Ïingdorbar Thawaiñ u Malthus S Sangma u la lap ïa ki kot ki sla jong u James K Sangma ki long kiba la biang nadong shadong bad kumta la pdiang ïa ki, ong ka kyrwoh na Assembly Secretariat.
U James Sangma, uba la shakri kum u myntri kam pohïing barim jong ka jylla, u la thep kyrteng ha ka 8 tarik mynta u bnai ban ïakhun ïa katei ka shuki da ka jingkyrshan jong baroh ki party kiba don lang ha ka sorkar synrop jong ka MDA.
Naba ym don uwei ruh u kyrtong ha ka jingïakhun, ka tarik ba khatduh jong ka 11 tarik Jylliew ban weng noh ïa ki kyrteng kan long ka sienjam kaba khatduh shwa ban pyndep ïa ka elekshon.
