Mawkyrwat, Jylliew 09 : Ka South West Khasi Hills District Sports Association (SWKHDSA) bad ka Mawkyrwat Arm-Wrestling Association (SWKHD) ki la ai khublei bad jingïaroh kyrpang ïa ki nongïalehkai arm-wrestling jong ka distrik kiba la wanrah nam bad burom ïa ka South West Khasi Hills District bad ïa ka Jylla Meghalaya ha ka jingïakob jong ka 4th Pafi National Arm-Wrestling Championships 2026 kaba la long ha Gujarat.
Ha kane ka jingïakob, u Jimmison Marweiñ u la pynpaw ïa ka jingïalehkai kaba tbit bha da kaba khur ar tylli ki takma ksiar ha ka kyrdan Youth Category (Below 65 Kg), kata ha ka jingïakob da ka kti kamon bad ruh da ka kti kadiang. Katba u Samuel Nongsiej u la ïoh khur ïa ka takma rnong ha ka kyrdan Junior Category (Below 55 Kg) ha ka jingïakob da ka kti kadiang. Ka Banrihun Lyngdoh pat ka la ïoh rah ïa ka takma rupa ha ka jingïakob da ka kti kamon ha kajuh ka kyrdan.
Ka SWKHDSA bad ka Mawkyrwat Arm-Wrestling Association ki la pynpaw ïa ka jingsngew sarong halor ka jingaiti lut, ka jinglong ryntih, ka jingïaishah bad ka jingtrei shitom jong kine ki nongïalehkai kiba la pynlong ïa ki ban poi sha kane ka kyrdan jong ka jingjop ha ka ri. Ki jingïoh jingïarap jong ki ym tang ba ki la wanrah nam bad burom ïa ka distrik hynrei ki long ruh ka jingïarap ban ai mynsiem ïa ki samla kiba dang wan shakhmat ha ka liang ka jingïalehkai.
Ha ka kyrwoh, ki ar tylli ki seng ki la ai jingïaroh ïa kine ki nongïalehkai kiba la mihkhmat ïa ka distrik bad ïa ka jylla da ka burom bad ka jingïalehkai kaba itynnad. Ki la ong ruh ba kine ki jingïoh jingjop ki pyni shai ïa ka jingkhlaiñ bad ka jingkiew shaphrang jong ka jingïalehkai arm-wrestling ha South West Khasi Hills District, bad ki pynskhem ruh ïa ka jingdonkam ban bteng ban kyrshan ïa ka jong ka kam jingïalehkai ïakhun kti.
Ka SWKHDSA bad ka Mawkyrwat Arm-Wrestling Association ki la phah ïa ki jingïakhublei kitbok kitrwiang sha kine ki nongïalehkai bad kyrmen skhem ba kin dang bteng ban kyntiew shaphrang bad ban ïoh khur shuh shuh ïa ki jingjop kiba kham khraw ha ki snem ban wan.
