Shillong, Jylliew 8 : Ka ïing Bishar High Court jongka jylla Meghalaya ha ka Lah Sngi U Blei ka la pynlong liang mamla lang ïa ka National Highway and Infrastructure Development Corporation Ltd (NHIDCL) kum ka nongshah mudui ha ka PIL halor ka jinglong jingman ka surok bah NH-06 hapdeng ka Jowai bad Ratacherra, bad bthah ïa ka NHAI ban aiti ïa ka kaiphod ka jinglong jingman ba mynta jong ka surok hapoh ka lai taiew.
Ka Division Bench jong ka Chief Justice Revati Mohite Dere bad Justice W Diengdoh ka la pynmih ïa kane ka hukum haba shong bishar ïa ka PIL bala mudui da u Bah Kynjaimon Amse, uba la khlad noh, pyrshah ïa ka NHAI bad kiwei.
Ha ka jingbishar, u nongïasaid aiñ ka NHAI S Sengupta ula aiti ïa ka kaiphod ba thymmai halor ka bynta jong ka surok na Jowai sha Ratacherra kaba long haduh ka 5 tarik Jylliew, 2026, ha ryngkat ki dur ki dar ba pyni ïa ki jingpyndap ïa ki tliew bad ka jingshna ïa ka kynroh ban tehlakam ïa ka jingtwa khyndew.
Ka ïing Bishar ka la shim bad buh ha ka jingthoh ïa kane ka kaiphod. Ka kam ba ïadei bad ki thliew ki syar ha ki katto katne ki bynta ba la khmih da ka tnad PWD lah pynsngew ruh da u Amicus Curiae S Panthi ha ka 14 tarik Jymmang.
Ka ïing Bishar ha katei ka por ka la bthah ïa u Additional Advocate General K Khan ban pynthikna ba dei ban pyndap ïa ki thliew ha ka surok.
Ha ka sngi Nyngkong, u Khan ula pyntip ha ïing Bishar ba ka bynta kaba mih jingkylli ka dei kaba khmih da ka NHIDCL, ym ka PWD bad la kyntu ban phah notice sha ka NHIDCL.
“Namar ki jingpyntip u Khan, la bynrap ïa ka NHIDCL kum ka liang mamla No 4. Phah notice sha ka NHIDCL bad ban wan rah biang ïa ka kam hadien lai taiew” hukum ka ïing Bishar.
Ka ïing Bishar ka la bthah ruh ïa u Amicus ban pyntip ïa ka NHIDCL ïa ka sngi shong bishar biang khnang ba kan lah ban buh ïa u nongïasaid. U Nongïasaid ka NHAI ula pan por lai taiew ban pyndep ïa ka jingpyndap khyndew ïa ki thliew bad ka kynroh bad ka ïing Bishar ka la ai tang lai taiew bad bthah ïa ka NHAI ban ai ïa ka kaiphod thymmai ha ka sien shong bishar ban wan.ïa kane la mukotduma la buh ban bishar biang ha ka 2 tarik Naitung 2026.
