Pynkup burom kumba 42 tylli ki dukan bam ba leh khuid bad bud ïa ki kyndon

Nongpoh,Jylliew 08: Ka ophis jong u Assistant Commissioner ka Food Safety, Ri-Bhoi District mynta ka sngi kala rakhe ïaka World Food Safety Day ha Science Hall Nongpoh, ryngkat ki nongseng kam lajong kiba buh ïaki dukan marbam ha kylleng ka dong Ri-Bhoi halor ka phang “from burden to solution, safe food everywhere”.
Ha kane ka sngi la wan ruh ban shim bynta da u Abhisek Saini, Deputy Commissioner ka Ri-Bhoi District, u Bah AB Tyngkan, Designated Officer bad Assistant Commissioner of Food Safety, Ri Bhoi, ryngkat ki nongbuh dukan bam na kylleng ka district.
Kum shibynta jong kane ka jingrakhe, la pynkup burom bad ai khusnam ïa kumba 42 ngut ki nongpynïaid ïaki dukan bam na kylleng ka Ri Bhoi district kum ka jingithuh ïa ka jingshimkhia jong ki ban bud ryntih ïa ki kyndon jong ka jingkoit jingkhiah ha kaba ïadei bad ki marbam baki die sha ki paidbah.
Haba kren ha kane ka sngi naka liang u Abhishek Saini u la ong ba ka jingpynbiang ïaki marbam kiba khuid ba suba bad kiba lait naki jingpang ka dei ka jingkitkhlieh jong ki bor pynïaid bad baroh ki dukan mar bam kiba ju die bad kamai ban ai bam sha ki paidbah.
U la ong ruh ba ki paidbah barabor haba ki leit bam ha dukan ki ju khmih lynti ïaki jingbam kiba khuid ba suba bad ki dukan hi kiba lah ban lehkhuid ki jukhring ïaki paidbah namar ki paidbah ki shanñiah haki bad kane ka kyntiew ïaka kamai bad ruh ka jingmlien jong ki ban lehkhuid.
U la kyntu ruh ïaki paidbah ba kim dei ban shim ba ka jingkhuid jingsuba tang kum ka rukom ban bud ïaki kyndon aiñ, hynrei ban don ka jingkitkhlieh namar ka jingkoit jingkhiah ka long kaba kongsan, u la bynrap.