Lano ka sorkar kan lah ban pynbeit bad pynkut ïa ki jingeh ki nonghikai : Sawkmie

Shillong, Naitung 19 : Lano ka sorkar kan lah ban pynbeit ïa ki jingeh ba ki nonghikai ha ki kyrdan jinghikai bapher bapher ki ïa kynduh bad mad jingeh na ka daw jong ka tulop ka long ka sur kaba la kren bynñiaw da u MLA jongka Mawlai Constituency u bah P.T Sawkmie haba u la ïohi biang ba ki nonghikai SSA ki la hap ban ïakhih bad sahmiet biang hajan Addl. Secretariat na ka bynta ban dawa ïaka tulop ba hynriew bnai. Haba ïakren bad u Mawphor u bah Sawkmie ula ong “ Dang ha kine ki khyndiat por ba la dep ki nonghikai Adhoc ki la hap ban ïakhih na ka bynta ban kyntiew ïa ka tulop jongki, mynta sa ki nonghikai SSA ki ïakhih ban ïoh ïa ka tulop ba 6 bnai jongki, kiba la maham ban ïakhih pat ki long sa ki nonghikai kontrak kumta lada hap ïakhih shi hap ïakhih ban ïoh ïa ka tulop kumno keiñ ka jingpule dangle kan kiew haka jylla nalor mynta la hiar lypa sha trai duh. Kumta ka sorkar ka la dei ban wanrah da ka polisi ha ka tnad pule puthi ban peit bad pynbeit bad pynkut syndon ïakine ki jingïakhih ki nonghikai da kaba peit bad thaw lad kumno ban ïoh siew beit ïa ka tulop jongki nonghikai bapher bapher man la u bnai ym shuh ba kin hap ïakhih shi ïakhih”.
U la ong shuh shuh “ Kane ka jingeh kaba ki nonghikai ki ïakynduh ka pynpaw shai kdar ba ki bor pynïaid ka tnad pule puthi kim shym la shim khia ne lehse ba kim don ki proh jabieng ne ki riew shemphang ki ban peit kumno ban pynkut syndon ïa kane ka jingeh. Hooid ngi sngewthuh ba ïa ka tulop SSA la siew 90% da ka sorkar pdeng bad 10 % da ka sorkar jylla, lada ka long 300 klur, 268 klur la siew da kas sorkar bad tang 32 klur da ka sorkar jylla. Ngi sngewthuh ruh ba ka jingpynslem ka dei na ka sorkar pdeng hynrei kane kam mut tang ïa ka jylla Meghalaya hynrei ïa baroh ki jylla. Ka jingkylli ka long balei ha kiwei ki jylla ki nonghikai kim hap ban ïakhih bad mih surok balei ka jia tang ha Meghalaya. Hato ym dei ha kiwei ki la thaw lad ban shim shwa na kiwei kiwei ki tnad ban siew tulop bad sa thep pat tang shu ïoh na Delhi. Balei hangne ha jylla ruh ym leh kumta khamtam dang shen u myntri rangbah ula pynbna ba la mang 1800 klur tyngka ban pynbha ïa ki skul, la dei ban pynlut shwa na kane ban siew tulop hynrei kan myntoi aiu ban bha ki skul khlem ki nonghikai hynrei kan myntoi aiu ban don ki nonghikai khlem ki skul kiba biang. Kine ki ïaïaid ryngkat ryngkat kumta shwa ban pynbha ïaki skul pynbiang shwa ïa ki nonghikai khnang ba ynda la biang lut nadong shadong ka pule puthi ruh kan kiew ha ka jylla kumba la tip ïa ka jylla haki por ba mynshwa ka jylla kaba biang bha ka jingnang jingstad”.
Kumta khatduh eh u bah Sawkmie u la kyntu jur ïa ka sorkar khamtam ïa ka tnad pule puthi ba kan shim khia ban wanrah da ka polisi ka ban pynbeit bad pynkut noh syndon ïa kine ki jingeh ki nonghikai khnang ba kin lait na ka ïakhih ne thiah surok tang ban ïoh tulop.