Nongstoiñ, Jylliew 08: Ka shnong Siejlieh Nongstoiñ lyngba ka Siejlieh Sport Social and Cultural Youth Organisation, ryngkat ka Dong Mawïaban, ka seng samla dong Mawïaban bad kiwei kiwei, ha ka janmiet jong ka 08 tarik Jylliew 2026, ka la ïoh ban pdiang burom ïa I Heprit Lasiewdor Syiemlieh khun jong I kong Ismondalis bad I bah Polee Lyngdoh, hadien ba ka la wanrah nam bad burom ïa ka shnong bad ïa ka jylla hi baroh kawei, da kaba khur ïa ka takma Rupa ha ka Arm Wrestling Championship kaba la long ha Gujarat.
La ong ba katei ka heprit ka la ïoh ïa katei ka takma ha ka kyrdan kaba ar kum ka National Champion ha ka jingïalehkai Arm Wrestling ïa kaba la dep ban pynlong dang shen ha Ahmedabad jong ka jylla Gujarat.
Ha ka jingpynkup burom, u bah Khrawbok Kharlyngdoh rangbah dong ka Mawïaban, u la ong ba kane ka long ka jingsngew sarong shisha ïa ka shnong hi baroh kawei, ha kaba ka shnong kat nangmih ki sngi ka la nang sakhi bad ïohi ba bun ki khun samla ki la sdang ban mih kum ki khlur.
Dang shen ruh la don kawei ka samla na kane ka shnong kaba la wanrah haduh 2 tylli ki takma Rnong, kumta ka dong ka ai mynsiem shuh shuh ïa ka heprit Lasiewdor na ka bynta ka jingpynkhreh ban leit ïashimbynta sa sha ka International level ka ban long mynta u snem 2026.
Kum ban shu pynkynmaw dang shen shuwa ba katei ka samla kan leit ïashimbynta ban mihkhmat na ka bynta ka jylla Meghalaya sha katei ka lympung, ki nongïalam ka Siejlieh Sport Social and Cultural Youth Organisation ryngkat ki nongkitkam jong ka Dong Mawïaban, ki la leit jngoh bad ai mynsiem ïa ka heprit Lasiewdor, namar ka dei ruh kaba dang kham rit ka rta kaba dei tang ha ka thup jong ki Sub Junior Championship.
