Pynbna u samla Raymond 20 tylli ki mat jingdawa, sha u Myntri Rangbah la ai ka dorkhas

Shillong, Jylliew 07: U samla Raymond Kharjana hadien ba la dep ka jingbam smai u la pyntip ba ka Khasi Student Union (KSU) kala buh ha khmat eh ïa ki ar phew tylli ki mat jingdawa ban pyntrei kam hapoh ka jylla Meghalaya.
Kum ban shu kdew ba hynnin ka sngi ka 6 tarik u Jylliew kala phah da ka dorkhas sha u Myntri Rangbah ka jylla u Conrad K Sangma ïa kine ki mat jingdawa kiba don ar phew tylli.
Haba kren kum u President ba 10 jong ka KSU, u samla Raymond ula kular ban pynjur ïa ka jingïalap halor ka jingdawa ban pyntreikam ïa ka Inner Line Permit, ban ïada ïa ka khyndew ka shyiap, ban wanrah ïa ka jingkylla ha ka pule puthi bad halor ka jingtih ïa u Uranium.
“Ka KSU ka don bun ngut ki shipai ki ban mih sha khmat ban trei bad leh eiei nalade, hynrei ngim dei ban pyndonkam bakla pat ïa la ka kyrdan ne ka bor”.
Ula pynpaw ïalade “Ba udei u samla u bym ju buhrieh bad u bym ju tieng” bad ka bynrap “Nga ngeit skhem ba baroh ki nongialam samla mynta kim ju buhrieh eiei ne ban sheptieng ïa ki aiñ ki kanun kiba ka pynjari”.
Ula ong ba ka Inner Line Permit kadei ka mat kaba kongsan bha jong ka KSU, u Kharjana ula ong, “Ka seng kan ym kynran dien tad haduh ba la pyntreikam ïa ka hapoh Meghalaya bad katba ym pat pyntrei kam ïa ka ILP ladei ban pyntrei kam pura shwa ïa ka MRSSA.”
Ula kynthoh pyrshah ïa ka rukom leh jong ka Sorkar Pdeng hadien ka jingiakynduh ïa u Myntri Kam Pohiing ka ri. “Ka long kaba sngewsih ba ha ka por ba ngi lah poi kala shu kut tang da ka jingaiti ïa ka dorkhas. Kam shim la don satia kano kano ka jingiakren kaba shisha ban pynbor ïa ka Sorkar Pdeng ban ai noh ïa ka ILP.”
Haba pyniasoh ïa ka projek rel bad ka jingwan rung kyrthep kiba nabar, ula ong “Khlem kano kano ka aiñ ban khmih bniah ïa ka jingwan rung be-ain ki briew kiba nabar sha ka jaka ka jong ngi, ngi ngin ym mynjur ïa kano kano ka jingkhot ïakren ha kaba ïadei bad ka rel”.
Ula ong ruh, “Ka jinglap jong ka kaiphod ka PGI halor ka jinghiar ka kyrdan ha ka pule puthi, u Kharjana ula kdew ba ki skul ha nongkyndong kiba don 5 ngut ki khynnah skul bad 6 ngut ki nonghikai hynrei ki don pat ki khep ba ki khynnah ki don 100 ngut hynrei ki nonghikai pat ki don tang 2 ngut”.
Ula ong ba ka KSU “Kan shim khia bha ïa kane ka ka mat bad ban pynbor arshah ban wanrah ïa ka jingkylla ha kaba ïadei bad ka pule puthi”.
Ha kaba ïadei bad ki Competitive Examination, u samla Kharjana ula ong, “Hapdeng ka jingduna ïa ki jingdonkam bad jingdon jingem, lyngba ka jingiarap bad jingnoh synniang jong kiba bun ki briew kiba sngewkhia, la phah arsien ïa ki samla pule sha Delhi ban ioh ïa ka jinghikai pyntbit”.
Ula kular “Katba ngim pat lah ban pynmih hi ïa ki IAS ne IPS ophisar na ki doh ki snam ki jong ngi, ka seng kan ym shongthait.Ngin pyrshang beit katba nang mih ki snem”.