Ka GHADC kan ïaibteng ban dap ram bad duna pisa namar ba pyndonkam bakla ïa ka Central Fund kynnoh u Marak

By Mawphor Editor On Jun 8, 2026

Shillong, Jylliew 7 : U MDC ka BJP na Tura u Bernard N Marak u la kynnoh ba ka Garo Hills Autonomous District Council (GHADC) kan ïai bteng ban dap ram bad kyrduh pisa namar ka jingpyndonkam bakla ïa ka pisa ba la ai da ka sorkar pdeng (Central Fund) kaba dei ban pyntreikam da ki Dorbar Shnong ne ki Rural Local Bodies (RLB) bad ki Urban Local Bodies (ULB).
Ha ka jingpyllait khubor mynta ka sngi u la kam ba ka pisa ba la pyllait da ka sorkar pdeng hadien ka jingïamynjur lang kat kum ka Finance Commission ba 15 la pyndonkam bakla da ka EC jongka GHADC.
U la ong ïa kane ka pisa la dei ban pyntreikam da ki Dorbar Shnong hynrei la pyndonkam pynban kum ka pisa ka party da kaba ai kam sha ki kontraktor kiba ym ban tbit bad kiba ym lah ban pyndep ïa ka jingtrei.
“ Kumta ka jingïai kyrduh bad duna pisa ha ka GHADC kan ïai bteng namar ka jingpyndonkam bakla ïa kane ka pisa ba ai ka sorkar pdeng da ka EC jongka GHADC da kaba ai kam sha ki kontraktor kiba ym pat tbit bad na kata ka daw ym lah ban ai ki Utilisation Certificate ruh.” Kynnoh u Marak.
Kane ka jingbym bud ryntih ïa ki kyndon ka sorkar pdeng bad bteng ban pyndonkam bkla ïa ka pisa ka sorkar pdeng ka ïalam sha ka jingbym siew ïa ka 40% da ki kontraktor kaba pynlong pat ïa ka GHADC ban hap siew ïa ka GST. Ha ka jaka ban kiar na kaba ngat ha ki kuna GST ka EC ka thung pynban da u consultant uba dang shu pass Class X na ka bynta katei ka pisa ba 8 klur bad ka jingsiew pat ïa u ha ka dor 2 lak tyngka shibnai. Na ka liang ka EC jongka GHADC ka kam ba ka jingsiew ïa ka pisa ka long ban lait na ka jingshah daiñ kuna ha ka GST hynrei mynta la pynngat ha kita ki kontraktor bym pat tbit jong ki MDC kiba pynïaid ruh ia ka EC bad ïa kiwei ki MDC. Mynta bun ki Contraktor ki la ngat ha ka kuna jong ka GST.
U la ong ba ka GHADC ka la ïaid lait ïa ki kyndon da kaba ai kam sha ki briew jnog ka party kiba ym lah ban pyndep ïa ka kam bad ym lah ban ïoh ïa ki UC bad kane ka ktah jur pat ïa ka pisa ba dei ban ïoh da ki RLB bad ki ULB kaba dei ka hok ban pynkhlaiñ ïa ki ADC. Ka jingbym lah ban pynbiang ïa ki UC ka la ktah jur namar ka sorkar pdeng ka la bat ïa ka pisa ba 200 klur tyngka kaba dei jongka GHADC bad kane ka ktah wat ïa kiwei kiwei ki kam ka ADC ruh.
U la ai nuksa ba kumba 95 % ka kam la ai sha ki kontraktor ki bym pat nang trei ha ka Tura Constituency kata ruh khlem da ïamir jingmut bad u kum u MDC. U la ong ba wat ïa ka pisa ba la mang kum ka special package ha u snem 2015-16 ka la jah rngai bad ki projek ruh ki la jah rngai bad kiba la sdang ruh la shu ïeh khongreng khlem lah ban pyndep.
U la ong ki Dorbar Shnong ki khlem ïoh jingmyntoi ei ei ruh em bad kiba ïoh ki dei tang ki briew jongka party kiba dei ki kontraktor ki bym pat tbit ban trei ïa ki kam.