Dawa ki Muster Roll na Jaintia ban siew ka sorkar ïa ka bainong ba 3 bnai shwa ka Behdeiñkhlam

By Mawphor Editor On Jun 8, 2026

Shillong, Jylliew 7: Ka All Jaiñtia Muster Roll Workers & Labour Union ka la dawa ïa ka Sorkar Jylla ba ka dei ban pyllait noh mardor ïa ka jingsiew bai bylla kaba dang sah lai bnai jong ki nongtrei muster roll hapoh ka tnat PWD bad PHE ha shwa ka lehniam Behdeiñkhlam.
Ha ka jingïalang jong ka Central Executive Committee kaba la long ha Mihmyntdu, ka Union ka la kyrpad ïa u Chief Engineer, PWD Roads and Building bad ka tnat PHE ban pyllait noh ïa ka bai nong ba dang sahteng naduh u bnai Lber, Iaiong bad Jymmang 2026.
U Advisor ka Union u Bah Khroo L Pariat u la ong ba kane ka jingpynslem ban pyllait ïa ka bainong ka ktah jur ïa ki nongtrei Muster Roll bad ïa kiba ha ïing ha sem jong ki. “Ka jingpynslem ban pyllait ïa ka bainong jong ki nongtrei muster roll ha PWD bad PHE ka ktah ïa ka jingim jong ki namar ba ka jinglut jingsep bad ka dor jong ki mar mata ka dang ïai kiew man ka sngi” u la pynpaw.
U Ma Khroo u la buh jingkylli ruh ïa ka jingkitkhlieh bad ka jingtrei hok jong ki ophis jong ki tnat namar wat hapdeng ka jingbthah jong ka tnat Finance ïa baroh ki tnat Sorkar ban aiti ïa ki jingtip ba bniah jong ki nongtrei muster roll. Kane ka jingbthah ka long ban ailad ïa ka Sorkar ban buh pisa lai bnai shwa na ka bynta ban siew ïa ka bai nong.
U la kdew ba u Myntri Rangbah ka Jylla Conrad K Sangma kham mynshwa u la pynthikna ba ka pisa na ka bynta ki nongtrei muster roll ka don.Ka Union ka kyrpad ïa baroh ki heh jong ki tnat Sorkar kiba ai kam ïa ki nongtrei muster roll ba kin pyllait noh ïa ki jingsiew kiba dang sahteng khlem da pynslem shuh.
Ka la pan ruh ïa ka jingïarap jong u Myntri Rangbah ka Jylla, da kaba kdew ïa ka jingkordor jong ka Behdeiñkhlam ha Raij Jowai bad Raij Tuber.
“Ngi kyrpad ïa u Myntri Rangbah ka Jylla ba un bishar bniah ïa kane ka jingkyrpad, khamtam ba ka Behdeiñkhlam ka la jan, dei ban pynsiew lut ïa ka bai nong ba dang sah hashwa ban kut u bnai Jylliew khnang ba ki nongtrei kin ïoh ban rakhe ïa ka lehniam ryngkat bad kiba haïing hasem,” ong u Bah Khroo.
Ka Union ka la kyntu ïa ka Sorkar ba kan pynkhuid noh ïa ka Arrear ba dang sahteng kiba dei ban siew sha ki nongtrei muster roll.