Man ka 2 second ki briew ki donkam snam, kumta donkam bha ban mih shakhmat ban ïada ka jingim briew: RS Mawkhar

Shillong, Jylliew 07: Manla ka 2 second ki briew ki donkam ïa ka snam manla ka sngi bad kumta ka jingai snam ei ka long kaba kongsan bha, ong u Rangbah Shnong (RS) ka Mawkhar Dorbar Shnong u Bah Ransom Sutnga haba kren plie ïa ka Voluntary Blood Donation Camp ba la pynlong da ka Seng Kynthei Mawkhar Welfare Association (SKMWA) hapoh Khasi National Dorbar Hall.
U la ong ba ka jingai snam ka long kaba ai jingim bad manla ka sngi ki briew ki donkam ïa ka snam kumta kum kine ki prokram ba la pynlong da ka seng kynthei ka long kaba kongsan bha bad donkam ban pynlong manla ka por naba ka Executive Committee jong ka Dorbar Shnong kan ïai kyrshan na ka por sha ka por.
Na ka liang jong u, u la pynshlur ïa ki khun samla, ki longkmie longkpa bad ka Sports Club jong ka Dorbar Shnong ba kin mih barabor shakhmat ban ai ïa ka snam ha kum kine ki prokram khnang ba kan lah ban ïada ïa ka mynsiem jong ki briew kiba pang kiba donkam ïa ka snam manla ka sngi.
Kumta ka dak ka jingïasnohktilang bad ka jingai jingkyrshan na ka jong u, ula noh synniang ruh da ka song pisa sha ka Seng kynthei ba kan pyntyllun ïa kane ka kam bad u la plie ruh ïa kane ka camp ha kane ka sngi.
La ïoh ka jingkren maitphang na ka Vice President ka seng kynthei Mawkhar Welfare Association Kong M Nongrum kaba la ïathuh ba ka seng longkmie ka la ju pynlong ïa kum kane ka prokram manla ka por bad batai ruh ba dei na ka jingïohi jong ka seng ïa ka jingdonkam jong ki para briew ïa ka snam ha ka por ba ki pang ki shitom, ki la pynlong ïa kane ka prokram manla ka por.
La ïoh ruh ka jingkren na ka Kong Lugracia M Shullai Program Officer Meghalaya State Blood Transfusion Council ba la ïathuh ba tang 20% ki briew ki aisnam ei ha ka shisnem.
La pynïaid ïa ka jingaisnam ei da ka Dr. R Allya Regional Blood Centre Pasture Institute.
Ha kane ka sngi la sdang ïa ka jingaisnam da ki dkhot ka seng longkmie bad la shimbynta ruh da kiwei pat.
Ha kawei pat ka liang u Rangbah Shnong ka Dorbar Shnong Mawkhar u Bah Ransom Sutnga u la ai khublei ïa ka Seng kynthei Mawkhar Welfare Association kaba la shim ïa kane ka sienjam ban pynlong ïa kane ka prokram manla ka por bad kumjuh ruh ha ka sngi Saitjaiñ bad u la pynpaw ba ka Dorbar Shnong kan ïai kyrshan manla ka por ia kum kine ki prokram bad u la kyntu ruh ïa kiwei ki dorbar shnong ba kin shim khia lem ban ïai pynlong ïa kum kine ki prokram kiba long ka jingmyntoi kaba khraw ia ki nongshong shnong bad kumjuh ruh ïa ki paidbah ka jylla kiba pang bad kiba donkam kyrkieh ïa ka snam manla ka sngi.