Jowai, Jylliew 07: Ka Pnar Student Movement (PSM) Central body ha ryngkat ki nongïalam ka PSM Khliehriat Circle, ki la leit ban ai mynsiem ïa u Marshall Biam, President ka JCOMSWA u ba dang shong shah thngan la 5 sngi haduh hynnin bad khlem da buh por tad haduh ba ka sorkar kan shah ïa ka kam tih dewïong.
Na ka liang ka PSM kala pynsngew ba ha ki por ba mynshwa hapoh u snem 2014 ka ïew ka hat, ka trei ka ktah bad ka kamai kajih ka long kaba biang. Hynrei naduh ba la khang ïa u dewïong baroh kine ki la hiar lut bad buh ïa ki nongshong shnong ha ka jingeh bakhraw nadong shadong khamtam ha ka ban pynnang pynstad ïa la ki khun ki kti.
Kumta na ka liang ka PSM ka kyrpad ïa baroh ki nongshong shnong jong ka ri lum Jaiñtia, ki sengbhalang kumjuh ïa ki nongmihkhmat naduh ki MDC bad ki MLA ba kin wan ai mynsiem ïa u Marshall Biam khnang ba un nang ïohbor shuh shuh ban pynur long ïa ka jingdawa.
Kumjuh ruh ka Seng ka buh ka jingkyrpad ïa ka sorkar MDA-II hapoh ka jinglamkhmat u Conrad K Sangma kum u Chief Minister, u ma Sniawbhalang Dhar (Deputy CM) kamjuh ïa u Prestone Tynsong, (Deputy CM) ki ba long ki nongïalam ba ha khmat ba kin wad ki lad ki lynti ban ïoh plie biang ïa ka kam tih bad khaïi dewïong.
La kyrpaad ïa ka sorkar ban shim khia kloi khnang ba u President ka JCOMSWA u Marshall Biam uba shong shah thngan un lait na ka jingshah ktah ka koit ka khiah jong u. Kane ka long katkum ka kyrwoh na u Publicity Secretary ka seiñ PSM u S. Lakiang.
