Nongstoiñ, Jylliew 07: Ha ka sngi saitjain ka 6 tarik Jylliew u bah Gabriel Wahlang MLA ka Nongstoiñ constituency u la lum ïa ki nongshong shnong kiba don jingduna ha ki dkhot met bad ki riew tymmen kiba la phraphew snem shaneng ka karta ha Bishop hall New Nongstoiñ na ka bynta ban ai jingïarap ïa ki.
Ha katei ka sngi shuwa ban sam ïa ki jingïarap la pynlong ïa ka jingïalang ba lyngkot ha kaba la pynïaid da u bah L.G.Nongsiej working president ka NPP Nongstoiñ constituency bad la ïoh ïa ka jingkren na u bah Nestingdar Nongdkhar u nongïalam ba ha khmat jong ka Congress uba la pynïasoh noh sha ka National Peoples Party.
U Bah Nongdkhar haba ai jingkren ha katei ka sngi u la ong ba hadien ba u bah Gabriel Wahlang u la jop ïa ka Election MLA ha u snem 2023 na ka seng Congress u la shong ha ka liang pyrshah ha kaba ki nongïalam jong ka party ki la hap ban ïashong pyrkhat namar ba lada shong ha ka liang pyrshah kan ym don jingmyntoi ei ei ïa ki paitbah.
U la ong ruh bad ki la ai jingmut ïa u MLA ba na ka bynta ka jingbha bad ka roi ka par hapoh ka constituency u la dei ban leit pynïasoh noh bad ka party kaba don ha ka sorkar khnang ba ka constituency kan ïoh ïa ka roi ka par kaba biang.
Nalor kata u la ong ruh ba hadien ba u MLA u la kohnguh baroh ki nongïalam na ka party Congress jong ka Nongstoiñ constituency ki la leit ban pynïasoh noh sha ka National Peoples Party kaba bat mynta ïa u lakam synshar hapoh ka jylla.
Ha kaba ïadei bad ka jinglumlang jong u MLA ïa ki nongshong shnong kiba duna dkhot met bad ki riew tymmen kiba la phraphew snem shaneng lah ban ong ba ka dei ka sien ba nyngkong eh ha ka constituency ba kiba kum kitei ki nongshong shnong kin ïoh jingïarap na u nongmihkhmat.
Nalor kata wat la ym lah ban tip katno ki ïoh jingïarap shibun ne khyndiat hynrei kumba ki riewstad ki ong “Something is better than no thing” ka jingai kaba khydiat ka kham kordor ban ïa ka jingbym ai ei ei ka la long ka jingkyrkhu kaba khraw na ka bynta kito ki nong ïoh bynta na katei ka jingïarap jong u.
Katei ka jing ai jingïarap jong u MLA ka long ruh kum ka jingïadon bynta lang ban ïa kit lem ïa ki jingeh ba ki ba duna dkhot met ki ïakynduh.
Ha kaba ïadei bad ka jingïarap ïa ki riew tymmen kiba la phraphew snem sha neng pat ka long ka bynta kaba kongsan tam ha ka longbriew man briew ba kiba dang shait dang khlaiñ kin noh synñiang ïa ki riew tymmen kiba la long ki nong prat lynti ban tei ïa ka shnong ka thaw bad ka imlang sahlang kaba ïaid beit ïaid ryntih kum ba ka long.
