ïalam u Myntri Rangbah ban thung ‘Tiewsaw ha UP bad Rhododendron Trekking

Shillong, Jylliew 6 : U Myntri Rangbah ka Jylla u Conrad K Sangma ha ka Sngi Thohdieng, ula ïalam ïa ka jingïathung dieng tiewsaw, ha Sangmein, 5th Mile, Upper Shillong Rhododendron Trekking, kum shibynta jong ka jingrakhe ïa ka Sngi Pynneh Mariang ne ka World Environment Day 2026.
ïa kane ka prokram la pynlong da ka Tnad Forest & Environment hapoh matpdeng “Inspired by Nature. For Climate. For Our Future”. Kane ka jingïathung dieng ka phaikhmat sha ka jingpynneh pynsah bad pynroi ïa ki dieng Rhodendron arboretum, ba ju tip ha ka Khasi kum dieng ‘tiewsaw bad Latuthin ha Jaintia.
ïa kane ka prokram la pynlong ha Rhododendron Trek ha Upper Shillong, kaba thmu ban kyntiew ïa ka jingsumar ïa ka mariang, ban pynneh pynsah ïa ki jingthaw ba im, bad ban pynrben biang ïa ki khlaw ki btap haba sumar ïa ka spah mariang ba ïoh pateng ka Jylla.
Haba ai jingkren, u Myntri Rangbah ula ban jur ba ki prokram ka Sorkar ki dei ban ïai pynleit jingmut halor ki nongshong shnong bad ka bha ka miat u paidbah ha ka jaka ban burom ïa ki heh ki haiñ bad ka burom kyrdan.
“Ki prokram kum kine kim dei ban long shaphang ki VIP bad ki Myntri Sorkar hynrei ki dei ban long na ka bynta u paidbah bad ki nongshong shnong” ula ong haba ban jur ba ki prokram ka Sorkar ki dei ban long beit na ka bynta u paidbah bad ban shakri ïa ka thong kaba heh ïar jong ka bha ka miat u paidbah bad ka jingïashim bynta ki shnong ki thaw.
U Myntri Rangbah ula ai burom pynban ïa ki khynnah skul ha ka kyrteng jong ka Sorkar Meghalaya bad pynshlur ïa kiwei ki Ophisar, kynthup u Chief Secretary, ban ïasnohkti ha ka ban ithuh ïa ki khynnah namar ka jingïashim bynta bad jingsynniang ha ka jingpynneh mariang.
Haba kren halor ka jingkongsan ka Sngi Pynneh Mariang ne World Environment Day, u Myntri Rangbah ula ong ba katba ka 5 tarik Jylliew ka long kum ka jingpynkynmaw ba donkam ïa ka jingkitkhlieh halor ka mariang, ka jingsngewthuh halor ka mariang ka dei ban bteng lynter ym tang ha ka shisngi.
“Ha nga, man ka sngi ka dei ka Environment Day. Baroh 365 sngi jong u snem ka dei ban long ka Environment Day. Kane ka sngi ka dei ka jingpynkynmaw ïa ngi ban pynthikna biang ïalade ha ka ban ïada bad pynneh pynsah ïa ka mariang jong ngi, hynrei ka jingkitkhlieh jong ngi kam kut satia tang hangne” ula ong.
Ula ban jur ba ka jingpynneh pynsah ïa ka mariang kaba don jingmut ka dei ban long da ki kam kiba rit, manla ka sngi bad ka jingkylla ha ka rukom im ba la jied hi da ki briew. Kat kum ka jingong jong u, ka jingïapyrshang lang, wat haba paw kum kaba rit eh, ka lah ban wanrah ïa ka jingkylla kaba khraw haba la shim lang da ka imlang sahlang baroh kawei,
“Kam dei satang halor ka jingthung ïa ki dieng lane ïashim bynta ha ka jingpynkhuid shnong tang ha ka shisngi ba la buh. Ka dei halor ka jingjied kaba rit kaba ngi leh man ka sngi ka jingïai trei, jingsumar, jingtyngkai ïa ka bording, jingpynlip ïa ki bor ding ha bym donkam, pynduna ïa ka jingpyndonkam ïa ki kali, jied ïa ki lynti kiba neh, bad thung dieng kat haba lah. Kine ki kam kiba rit, haba khein lang ïa ki hajar bad million ki briew lada ïashim bynta lang ka lah ban wanrah ïa ka jingkylla kaba khraw” ula ong.
Haba kren halor ka jingthung dieng tiewsaw ha kane ka prokram, ula ong ba kane ka sienjam kan synñiang ym tang sha ka jingpynneh ïa ka mariang hynrei ruh kan long sha ka kam jngohkai ka Meghalaya.
“Ngi la thung ïa ki symbai dieng tiewsaw namar ngi ngeit ba kane ka dei kawei pat ka synñiang ba don jingmut sha ka mariang jong ngi. Ha kajuh ka por, kan nang pynsngewtynnad ïa ki nongwan jngohkai ban ïohi ïa kum kine ki dieng bad ban ïaid kai ha kine ki lynti ïaid kjat ba itynnad. Da ka jingpynneh pynsah bad pynitynnad shu shuh ïa ka mariang jong ka Jylla, ngi lah ban khring kham bun ki nongwankai bad thaw ïa ki lad kamai jakpoh ïa ki samla jong ngi”.
Kane ka prokram ka ïaid lang ruh bad ka National campaign “Ek Ped Maa Ke Naam” bad kyntiew ïa ka nongrim jong ka LiFE (Lifestyle for Environment), kaba pynshlur ïa ki nongshong shnong ba kin shim ïa ka jingkitkhlieh ban leh ïa ki kam kiba ïada ïa ka mariang kum ka jingtyngkai ïa ka um bad ka bording, pynduna ïa ka jingpynmih jaboh, kiar na ka jingpyn donkam ïa ki plastic ba shisien pyndonkam bad kiwei kiwei.
U Chief Secretary Shakil P Ahammed, ki Ophisar Rangbah ka Sorkar, ki Ophisar ka Tnad Forest & Environment, ki nong mihkhmat na ki Shnong ka thain bad ki khynnah skul na San Mer Basic School, St.Gabriel School bad Saw Mer Presbyerian School, ki la ïadonlang ha kane ka prokram.