Pdiang ka UDP ïa ka jingïehnoh jong u Bah Robertjune Kharjahrin, kyntait u President ba don jingïapher

Shillong, Jylliew 06 : U President ka United Democratic Party (UDP) Bah Metbah Lyngdoh u la pyntikna ba ka party ka pdiang ïa ka shithi resain jong u Bah Robertjune Kharjahrin, ba dei ruh u kyrtong MP ka RDA ha ka elekshon 2024 da kaba kyntait ruh ba ka don kano kano ka jingïapher jingmut ha ka party.
“Baroh ki don ka jinglaitluid ban pyrkhat katba ki mon. Nga kwah ruh ban pynshai ïa kino kino ki jingartatien ki bym shai ha ka jingmut jingpyrkhat jong ki briew”, la ong u President haba kylli halor ka rai jong u Bah Robertjune ban mih noh na ka party.
“Ngi la ïoh pdiang ïa ka shithi iehnoh kam jong u da kaba kdew ïa ki daw. Na ka liang ka party ngim don eiei shuh ban ong. Ngi burom ïa ka rai jong u bad ngi la pdiang ïa ka jingiehnoh kam jong u”, u la bynrap.
Kumban shu kdew hangne u Bah Robertjune um shym la poi sha ka thong ha ka elekshon MP kaba long ha u snem 2024 na Shillong Seat na ka tiket jong ka Regional Democratic Alliance kaba dei ka kynhun treilang hapdeng ka HSPDP bad UDP.
“Kumba nga la pynshai, kam don kano kano ka jingïapher jingmut ha ka party. Kumba nga la ong, ngi la ïoh ïa ka shithi iehnoh kam jong u, kumta ngam ïohi ba ka don ka jingïapher jingmut hapoh ka party”, u la ong.
Haba kren pat halor ki ishu ba pynpaw da ka UDP Shillong City, u President u la ong ba ïa ki kam jong ka party yn sa pynbeit hapoh ka party hi.
“Baroh ki don ka hok ban pynpaw ïa ki jingsngew ne ki jingeh halor ki rai jong ka party. Ka don beit ka rynsan hapoh ka party na ka bynta ban ïakren, ban ïasyllok, bad ban ïamir jingmut halor kino kino ki kam kiba ïadei bad ki kam party”, u la bynrap biang.
U la pynthikna ba ka shithi na ka Shillong City unit kadei kaba lait sha ki paidbah hynrei u la ong ba la pynbeit ïa katei ka mat.