Naduh 2019 thung dieng palat 7.5 klur ki shipai CAPF bad buhthong ban thung sa 2 klur tynrai ha u 2027 -Amit Shah

Lankamura, Jylliew 06: U Myntri Kam Pohïing jong ka sorkar pdeng bad u Myntri ka tnad Ïatreilang, u Amit Shah u la leit jurip ïa ka Lankamura Border Outpost (BOP) jong ka BSF ha Tripura bad ai mynsiem ïa ki shipai da kaba ïakren bad ki nongïada ïa ka thaiñ khappud.
Ha ka sngi rakhe ïa ka World Environment Day, u Myntri Kam Pohïing ka sorkar pdeng u la thung ïa u dieng agar ha Agartala, ka nongbah jong ka jylla Tripura, kum shi bynta ka prokram thung dieng. Ha kane ka sngi, u Myntri Rangbah ka Tripura u Dr. Manik Saha, u Union Home Secretary, u Director jong ka Intelligence Bureau, u Secretary (Border Management), bad u Director General jong ka Border Security Force, ryngkat ki katto katne kiwei pat ki kynrem ki lyndan ki la ïadonlang.
Ha ka jingai jingkren jong u ha kane ka sngi, u Myntri Kam Pohïing ka sorkar pdeng uba dei ruh u Myntri ka tnad Ïatreilang u Amit Shah u la ong ba la pynlong ruh ïa ka prokram thung dieng hangne mynta ka sngi. U la ong ba naduh u snem 2019 haduh mynta, ki briew na baroh ki Central Armed Police Force (CAPF) jong ngi ki la thung palat 7.5 klur tylli ki dieng. U la ïathuh shuh shuh ba mynta u snem, yn thung hapdeng 40 lak haduh 60 lak tylli ki dieng, bad baroh kito ki tynrai dieng kiba khlem lah ban im yn sa thung thymmai biang. U la bynrap ba ha u snem ban wan, ki shipai CAPF kin thung 2 klur tylli ki dieng, da kaba noh synniang ban ïada ïa ka mariang bad ban shakri ïa ka ri.
Ha ka World Environment Day mynta ka sngi, u Amit Shah u la ban jur ïa ka jingdonkam ban pynneh pynsah ïa ka mariang bad ïa ki kam ba la leh da ka sorkar Modi ha kane ka bynta. U Shah u la ong ba ka Ozone layer kadei kaba pynlong ïa ki kjat sngi ban long kiba biang na ka bynta ki briew bad kiwei kiwei ki jingthaw ba im. U la bynrap ruh ba tang kawei ka lad ban weng ïa kane ka jingeh ka long ban pynbun ïa ki dieng.
U Myntri Kam Pohïing jong ka sorkar pdeng u la ong ba u Myntri Rangbahduh ka ri u Narendra Modi u la shim bun tylli ki sienjam ha kajuh ka por na ka bynta ban ïada ïa ka mariang. U la ong ba ha kane ka bynta, la ithuh ïa ka rukom treikam jong ka India kum ka rukom treikam kaba long ka nuksa ha ka Paris Conference. U Shah u la ong ba da kaba pynurlong ïa ki thong jong ka Paris Agreement hashwa ka por, ka India ka la pyni ïa ka jingkut jingmut jong ka ban ïada ïa ka mariang, kumba la paw ha ka khubor jong ka jingpynneh pynsah ïa ka mariang ha ka Rigveda, hakhmat ka pyrthei. U la ong shuh shuh ba baroh ki shipai CAPF ki sumar bha ïa uwei pa uwei u tynrai dieng da kaba kheiñ ïa u kum u dkhot jong ka ïing ka sem jong ki. Kane kam dei ban long ka prokram kaba la pynïaid da ki hukum jong ka sorkar, hynrei kadei ban long ka jingmlien kaba man ka sngi, namar dei kane ka jingmlien kaba lah ban ïada ïa ngi.