SPL 2022 : Khur suk ka Nangkiew Irat ïa ki lai point hadien ba pynliem ïa ka Malki da 3-1 kol

By Mawphor Editor On Jul 20, 2022

Shillong, Naitung 19 : Ka Nangkiew Irat SC ka la ïoh ban khur suk ïa ki lai point hadien ba ka la ïoh ban pynliem haduh 3-1 kol ha ka jingïakhun kaba 22 jong ka Shillong Premier League kaba long ha ka janmiet sngi Ba-ar ha madan Third Ground, Polo, Shillong.
Ïa ki kol jop jong ka Nangkiew ha kane ka sngi la ïoh ban thep ar kol da u Damehun Syih ha ka minit kaba 45+2 bad bad 57 bda ïa ka shi kol pat la ïoh ban thep da u Shaibor Nongrum ha ka minit kaba 69. Ïa ka shi kol na bynta ka Malki pat la ïoh ban thep da u Khrawkupar Tamu ha ka minit kaba 90+2.
Shwa jong ka jingïakhun ha katei ka sngi, ka Malki ka don ha ka kyrdan kaba hynñiew da ki 4 point katba ka Nangkiew Irat pat ka don ha ka kyrdan kaba san da ki 5 point. Hynrei wat hadien katei ka jingïalehkai ruh kam shym la don kano kano ka jingkylla ha ka miej ïa khein point watla ka Nangkiew ka la nang jan sha ka Ryntih kaba don ha ka kyrdan kaba saw da ki 9 point.
Ka jingïoh jong ka Nangkiew ban lamkhmat shi kol ha ka kylla step ka dei lyngba ka jingphalang jong ka bol na ka kjat jong u rangïalehkai ka Malki kaba la poi beit beit ha kjat jong u Syih bad khyrwit suk ïa ka sha kol.
Haba la poi pat ka kylla miet, ka Malki ka la sdang ban ïakhun tyngeh bad ïoh ruh bun tylli ki kabu ksïar ban thep kol hynrei kam shym la lah satïa. Pynban ka jingbïang ka por jong u Syih ka la plie lad ïa u ban ïoh thep bïang sa shi kol hadien ba u rangap kol ka Malki u la mih tam sha bar kol kaba la plie lad ïa u tei u rangthep kol ban shu pynkïar tok ïa ka bol bad pynkhih bïang ïa ka jar jong ka Malki.
U Syih ha ka jingshisha u la dei ban ïoh thep hat-trick kaba la jan dei ruh kaba nyngkong eh ban ïoh da uno uno u rangthep kol mynta ka samoi, hynrei ka bol kaba u khyrwit jam bha ka la poi sha u Nongrum uba shu pyndei suk sha kol ban pynlong ïa ka Nangkiew ban ïoh tam da 3-0 kol haduh ka minit kaba 69 jong ka kylla miet.
Ka Malki kaba khlem ïoh ban thep kol ha ki lai tylli ki jingïakhun, khatduh ka la ïoh ban pynkhih jar lang lyngba u Tamu ha ka minit kaba khatduh shwa ban kut artad ka por ïalehkai.
Na ka lïang ka Mawkhar SC kaba don mynta ha kyrdan kaba phra da ki shi point kan hap pat ban aireng pyrshah ïa ka Mawlai SC kaba don hakhlieh duh jong ka miej ïa khein point, ha ka janmiet sngi Balang ha ka por 4baje janmiet.