Hiar ka jingshah pynïap ki riew paidbah sha ka 86 % ha NE ba la wan phai ka jingshongsuk

Shillong, Jylliew 4 : U Myntri ka sorkar pdeng uba dei peit ïa ka tnad kam pohïing u Amit Shah u la ong mynta ka Sngi Palei ba ka jingshah pyniap ki riew paidbah ka la hiar sha ka 86 % hapoh kine ki 12 snem ha kane ka thaiñ shatei lam mihngi ka ri India ( North East) bad kane ka la long ka jingjop kaba khraw bad kaba la plie lad pat ban kiew ka jingwan bei tyngka ki kompani baheh sha kane ka thaiñ.
Haba kren ha ka jingïalang jongka North Eastern Council kaba 73 u Shah ula ong ba kane ka jinghiar ka jingshah pyniap ki riew paidbah ka dei namar ba la bun ki soskular ïasuk ba la ïasoi bad ki kynhun kieng atiar kane ka thaiñ hapoh ka sorkar ba la ïalam da u Myntri Rangbah duh ka ri u Narendra Modi.
“ Hapoh ka sorkar ba la ïalam da u Modi ka jingiap ki riew paidbah ka la hiar sha ka 86% ha kine ki 12 snem bad kane ka la long ka jingjop kaba khraw namar palat 12 tylli ki soskular ïasuk la ïasoi hapdeng ki kynhun kieng atiar bad ka sorkar pdeng bad ki sorkar jylla bad kane ka la long kum ka jingplie lad ban kiew pat ka roi ka par ha kane ka thaiñ” ong u Shah.
Da ka jinglah ban ïai pynduh jait ïa ki kynhun kieng atiar, u Shah u la kyntu ïa ki Myntri Rangbah ban phai khmat noh sha ki polisi treikam bad kumjuh ruh ban peit ïa ki hok ki pot jong ki nongshong shnong.
“ Kane ka thaiñ shatei lam mihngi ka dei ban sdang ïa ka jingtreikam ba thymmai da kaba phai sha ki polisi treikam, bad buh hakhmat eh ban ïada ïa ki hok jong kiba duk, ki kynthei khynnah” ong u Shah.
U la ban jur ban pyndep kloi ïa ki jingbishar ba hok kat kum kine ki aiñ ba thymmai bad pyndonkam ruh ïa ki kor ki bor jong ka teknoloji.
“ Pynthikna ba kiba dei ban ïoh ïa ka jingbishar hok kat kum ka aiñ ba thymmai NayayaSanhita, pynkhlaiñ ïa ka jingpyndonkam ïa ki kor ki bor teknoloji ha ka jingbishar, pynkloi ban rai pynrem da kaba pyndonkam ïa ka forensic science, pdiang bad rejister ïa ki mukotduma lyngba ka online bad ai ba kin phla ruh lyngba ka online hakhmat ka ïing bishar khnang ba ki nongshong shnong kin ïoh ïa ka hok jongki ban pynpaw bad ban ïoh ruh ïa ka jingbishar kaba hok” ong u Shah.
Ha kaba ïadei bad u drok, u la ong ba ka sorkar ka la buh thong ban leh ïakaba donkam. “ Ka sorkar pdeng ka la pynkhreh kumno ban leh bad trei khlem kano kano ka jingsngew synei ban rat dyngkong ïa u drok kata ym tang ka kam khaïi drok hynrei wat ia kito kiba pyndonkam ne dih ïa u drok ha kane ka thaiñ shatei lam mihngi” u la ong.
U la ong ki Myntri Rangbah ki dei ban pynsngewthuh ïa ki paid nongshong shnong ïa kaei kaba ki dei hok ban ïoh kat kum ki hok jong ka riti synshar ka ri bad khamtam eh ban ai ka jingïada ba pura ïa ki.
U la ong ba kane ka thaiñ ka dei ka lad bah na ka bynta ka khaïi ka pateng lyngba ka digital namar ki samla kane ka thaiñ ki don la ka sap kaba paka. “ Ki samla kane ka thaiñ ki don ka sap kaba kyrpang ha ki kam digital kum ha ki Artificial Intelligence (AI) Data Analytics, Machine Learning bad Blockchain” ong u Shah.
U la ong ba ka donkam ban pyrshang ban pynlong ïa kane ka thaiñ kum ka jaka jong ki kam karkhana IT. U la ong ruh ba kane ka thaiñ ka long kaba riewspah bha ha ka kam pynmih bording la ka dei na ka um ne na ka sngi ruh bad ïa kane dei ban shim kum kawei na ki lad ban kyntiew ïa ka khaïi ka pateng ha kane ka thaiñ.