Maham ka Assembly Committee ïa ka jingkylla ka mariang naduh ka jingduna slap bad um ha Meghalaya

By Mawphor Editor On Jun 6, 2026

Shillong, Jylliew 5: Ka Jylla Meghalaya ka la mad lypa ïa ki jingshah ktah jong ka jingkylla ka suiñbneng, kynthup ïa ka jingkiew ka jingshit, ka jingkylla ka rukom ïoh slap bad ka jingjur ka jingduna um, ong u Chairman ka Meghalaya Legislative Assembly’s Committee on Environment Rakkam A Sangma haka jingrakhe ïa ka World Environment Day.
Haba kren hadien ka prokram thung dieng ha Meghalaya Legislative Assembly ha Shillong, u Rakkam u la ong ba ka jingpynneh pynsah ïa ka mariang ka dei ban long ka jingkitkhlieh lang namar ba ki jingeh kiba ïadei bad ka jinglong ka suiñbneng ki dang ïai bteng ban ktah ïa ka Jylla.
“Ka jingkylla ka suiñbneng ka la nang ktah ïa ka Meghalaya, da ka jingkiew ka jingshit, ka jingkylla ka rukom slap, ka jingduna um bad ka jingduna slap bad kine ki kylla long ki jingeh kiba nang jur” u la ong da kaba kyntu ïa ki nongshong shnong bad ki paidbah ban ïashim bynta shitrhem ha ki jingpyrshang ban pynneh pynsah bad pynroi ïa ki khlaw ki btap.
Kane ka jingkren ka la mih ha ka jingrakhe ïa ka sngi pynneh pynsah ïa ka mariang lane World Environment Day, ba pynlong da ka Committee on Environment, ha kaba ki MLA bad ki Ophisar ki la thung kumba 30 tylli ki dieng hapoh ka jaka jong ka Assembly kum shi bynta ban kyntiew ïa ka jingsngewthuh ïa ka mei mariang bad ka roi ka par kaba neh.
U Rakkam u la ong ba ka Committee on Environment kan dang ïai bteng ban rah ïa ki mat kiba ïadei bad ka jingïada ïa ka mariang bad ka jingpynroi ïa ka mariang bad kan trei ban pynsngewthuh kham bha ïa ki paidbah halor ki jingeh ha ka jingsumar mariang kiba ka Jylla ka kynduh.
U Secretary ka Meghalaya Legislative Assembly, u Malthus S Sangma u la ong ba ki jingthmu ban ïada ïa ka mariang ki dei ban ïaid shabar na ki jingthung dieng bad pynleit jingmut ha kaba pynthikna ïa ka jingim bad jingroi jong ki dieng ba la thung.
“Ka jingthung ïa u dieng ka dei tang ka jingsdang; ka jingkitkhlieh jong ngi ka long ban pynthikna ba un im bad un roi,” u la ong.
Ha kane ka prokram la wan ïashim bynta da ki dkhot ka Committee u Bah Ollan Singh Suin, u Arbinstone B. Marak bad u Bah Nujorki Sungoh, ryngkat ki ophisar jong ka Assembly Secretariat bad ka tnat Social Forestry.