Khluit tar ki paidbah ba shah khang lynti slem ha Polo ba wan u Amit Shah ha Shillong

Shillong, Jylliew 04: Katba ki dkhot jong ka KSU ki dang bteng ban pynlong ïa ka jingïakhih ba jar ba jar da kaba leit wah bad rah placard, ki flex ha kylleng ka Nongbah Shillong, kynsan mih ka jingïatai nia kaba la neh katto katne por hapdeng ki paidbah bad ki magistrate ha ryngkat ka jingdonlang ki pulit pahara ha thaiñ Polo bad kane ka la mih ruh hadien ba ki paidbah ki la shah khang ban ïaid na ka surok Polo ba wat hadien ba la kut ka jingïalang ha NEC ka Plenary Session.
Watla ki magistrate ki la pyrshang ban pynshai bad pyntip ruh ba ki la pynbna ba kan don ka No Entry sha kane ka thaiñ hynrei ki paidbah ki khie bitar pynban tad haduh ba ki bor pynïaid district ki la hap ban shah noh ïa ki ban ïaid.
Ha kane ka jingïania na ka liang ki paidbah ki la pynpaw ruh ba ka shimit ka jingpynslem ruh ka ladei ka jingduh nong kaba khraw ïa ki bad ong ba ka shi minit ka dei ka pisa na ka bynta jong ki.
Ha kane ka por la ïohi ruh ia ka jingpynpah horn kaba la slem bha da ki kali kiba la pyni ba ki la bitar ïa ki jingleh jong ki bor pynïaid distrik halor kane ka jingjia naba tang na ka daw ka jingwan jong ki heh ki haiñ hap pat ban sajia da kiba bun ki balang khamtam ki riew paidbah kiba leit sha la ki kam ki jam bad ki bylla sngi ba manla ka sngi.
Ha kane ka kynti la ïohi ba ki kali kiba bun bad khamtam ki ar shaka ki la shah pynïeng laiñ ha kane ka por na ka daw jong ka jingwan jong u Myntri ka Sorkar pdeng uba khmih ïa ka tnat ki Kam Pohïing u Amit Shah sha ka jingïalang kaba la pynlong ha NEC.