Shillong, Jylliew 03 : Baroh ki MLA ba don ha ka sorkar synrop jong ka Meghalaya Democratic Alliance -2, ha ka sngi Balang ki la shim lang da kawei ka rai ban phah da ka kyrteng jong u James K Sangma, Myntri barim ka sorkar jylla kum u kyrtong MP sha Rajya Sabha hadien ba ka samoi treikam u MP ba mynta kan sa kut noh shen.
Ïa kane ka rai, ka kynhun synrop jong ka MDA ba kynthup naduh ki MLA na ka NPP, UDP, HSPDP, BJP bad MLA shimet, ki la shim ha ka jingïa lang kaba long ha nongbah Shillong hapoh ka jingïa lam jong u Chairman ka MDA Conrad K Sangma bad Secretary ka kynhun Bah Paul Lyngdoh.
Lah ban kdew hangne ba ïa u MP sha Rajya Sabha yn jied da ki 60 ngut ki MLA ka Ïingdorbar Thaw Aiñ ka Jylla, bad kumba ka long hi u Kyrtong ka Sorkar MDA u lah ïoh ïa ka jingjop da kaba suk namar ka jingbun paid ki MLA ka Liang Synshar.
Haba kren bad ki lad pathai khubor, u Secretary ka MDA Bah Paul Lyngdoh u la ïa thuh ba ha ka jingïa lang baroh ki party ki la tyrwa la ki jong ki jong ki kyrtong hynrei ha kaba khatduh la jied ïa u kyrtong ba la tyrwa da ka party kaba bun paid tam bad kumta ka kyrteng u James K Sangma ka la ïoh ïa ka jingmynjur da kaba suk.
La pyntip ba ka jingthep kyrteng na ka bynta u kyrtong ka sorkar synrop kan long ha ka 05tarik mynta u bnai ha ka por 2:30 baje janmiet bad ka jingthep vote pat kan long ha ka 18tarik mynta u bnai.
