Mawkyrwat, Jylliew 03 : U kyrtong jong ka National People’s Party (NPP) sha ka ilekshon MP shiteng samoi sha Lok Sabha, u Dr. D.R.L. Nonglait, ryngkat bad ki nongïalam jong ka party, mynta ka 03 tarik Jylliew, 2026, ki la hiar sha ka shnong Wahkaji, South West Khasi Hills District, na ka bynta ban ïalap ilekshon bad ban pan jingkyrshan na ki paidbah jong ka thaiñ.
Ha kane ka jingïalang paidbah kaba la wan ban sakhi da ki spah ngut ki nongshong shnong, u Dr. D.R.L. Nonglait ula kyntu ïa ki paidbah ba kin pyni ïa ka jingïatylli bad ai ka jingkyrshan pura ïa ka National People’s Party (NPP)ha kane ka ilekshon shiteng samoi, da kaba ailad ïa kane ka party ban mihkhmat ïa ka Ri Lum Khasi-Jaiñtia hapoh ka Lok Sabha.
“Lada ka National People’s Party (NPP)ka jop ïa kane ka ilekshon, kan pynsuk shibun ïa ka Jylla ha ka jingïakhun ban pynrung ïa ka Ktien Khasi ha ka Khyrnit kaba Phra jong ka Riti Synshar ka Ri India, bad kumjuh ruh ban pynïoh ïa ka Inner Line Permit (ILP) hapoh ka Jylla Meghalaya”, haba ai jingkren, u Dr. Nonglait ha Wahkaji.
Ym tangkata, u la ong ruh ba lada u Dr. D.R.L. Nonglait u shah jied kum u MP, un trei shitom ban rah ïa ki mat kiba ktah ïa ka roi ka par jong ka Jylla, kynthup ïa ka jingkyrshan ïa ki nongrep, ka jingpynkhlaiñ ïa ka pule puthi, bad kiwei kiwei ki jingdonkam kiba kongsan jong ki paidbah.
Kiwei pat kiba la ai jingkren ha kane ka sngi ki kynthup ïa u bah Kitborlang Nongrem, State Secretary ka National People’s Party (NPP) uba peit ïa ka South West Khasi Hills District, u Dr. K.K. Nongsiej, District President ka National People’s Party (NPP), South West Khasi Hills District, bad u Bah Hamletson Dohling, Working President ka National People’s Party (NPP) Meghalaya State Unit.
