Ka jingpyntreikam da ka IEMS kan tehlakam ïa ka jinglaittuh ka khajna ong ka tnad Excise

Shillong, Jylliew 2 : Ka Sorkar Jylla ka la pynksan ïa ki jingpynkylla ïa ka rukom treikam ka Tnad Excise bad pyntreikam da ka Integrated Excise Management System (IEMS), da kaba ong ba kine ki rai ki dei kiba la shim da ka jingthmu ban wanrah ïa ka jingtreikam kaba shai kaba khuid ba suba ban tehlakam ïa ka jinglait tuh ka khajna bad ïaid kat kum ki jingpyrkhing hapoh ka Ri.
Kane ka jingpynshai ka la mih hadien ba ki nongkhaïi khamtam ki nongdie dukan wine store ki la pyrshah ïa ka IEMS namar ka jingduna ka jingïohnong.
Ha ka kyrwoh ba la pynmih ha ka sngi Ba-ar, ka Tnad Excise, Registration, Taxation & Stamp ka la ong “ ba ka la shimkhia ïa ka jingkren jong ki katto katne ki seng dukan kyiad phareng (retailer) ba ïadei bad ka Integrated Excise Management System (IEMS) bad ka jingpynbeit ryntih ïa ka jingïohnong ki dukan kyaid”.
Ka Tnad ka la bynrap ba “don bun ki jingkam ba la pynphriang ki dei kiba da jied, ki bym long pura bad ki bym lah ban ong na ka bynta ka jingmyntoi u paidbah, ki jingshisha ha ka liang ka khajna bad ka jinglong jong ka aiñ ha ka ri baroh kawei kaba la pynlong ïa kine ki jingpynkylla.”
Ka Sorkar ka la ban jur ba ki sienjam bala shim da ka Jylla ki dei kiba ïahap bad ki jingpynkylla ba la leh ha ka ri baroh kawei.
“Ha ri Indi baroh kawei, ki Sorkar Jylla ki la nang pynthymmai ïa ka rukom pynïaid ïa ka Excise lyngba ka jingbuddien ïa ki bitor kyiad lyngba ka QR, ka jingpynïaid ïa ki mar da ka kor digital, ka rukom treikam ba kham pyrkhing, ka jingpeit ïa ki lynti ai mar, ka rukom buh dor ba beit bad pynkhlaiñ ïa ki sienjam ban ïada ïa ka jingpynmih pisa” kala ong.
Ka Tnad ka pynpaw ba ha kiba bun ki Jylla, ka jingïoh nong jong ki dukan kyiad la buh da ka kyndon ba pyrrkhing bha, ïa ka commission la buh da ka Sorkar, lane ïa ki dukan kyiad la pynïaid lyngba ki State Corporation haba kdew ïa ka TASMAC model ha Tamil Nadu bad ka Delhi ka la shim ïa ka sienjam ban pynkhlaiñ ïa ka jingpyniaid hi ka Sorkar ïa ka kam.
Halor ka IEMS, ka Sorkar ka ong ba kane ka system ka dei kaba la wanrah ban pynthymmai ïa ka rukom treikam ka tnad Excise ha Jylla bad ban pynkhlaiñ ïa ka jingtreikam kaba shai bad kaba don jingkitkhlieh ha baroh ka lynti ïaid ka kyiad”.
Ka thong ba kongsan eh ka kynthup “ka jingkhang lad ban rah beaiñ sha kiwei pat ki jylla lane ka jingleh tuh, tehlakam ïa ka jingpynïaid ïew ïa ki kyiad thok, pynkut ïa ka jinglait tuh ki khajna, pynkhlaiñ ïa ka enforcement, pynthikna ïa ka jingbeit jingkheiñ ka stock bad ban ïada ïa ki nongthied bad ki kam khaïi kiba dei hok”.
Ka Tnad ka ong ba ki don bun ki jingshakri digital bad online permit kiba la treikam mynta bad ka jingtreikam lyngba ki kor digital kam dei kaba thmu ban pynkhia ïa ki retailer ba ïaid kat kum ka aiñ hynrei ban wanrah ïa ka rukom treikam kaba shai bad da ki technology kaba ïaid ryngkat bad kaei kaba buh hapoh ka Ri”.
Halor ka khajna ka Tnad Excise, ka Sorkar ka ong “ka dei ka khajna kaba synniang bun eh sha ka pla tyngka ka Jylla bad kaba kyrshan ïa ki jingpynlut ha ka roi ka par bad ki prokram na ka bynta ka bha ka miat u paidbah”.
Haba kren halor ka jingot ïa ka jingïohnong ki dukan kyiad, ka Tnad ka la pynshai ba kane ka jingpynkylla kam dei ka rai ba pynlong sohpdung ïa ki dukan kyiad, hynrei ka dei shibynta ban pynbeit ryntih kaba ïadei bad ka lynti ïaid jong ka kyiad bad ka jingbuh dor”.