Thut ka jingtreikam hapoh ka Chokpot Alagre CHC ba kyrduh um, kynnoh ba ym ju don doktor

Tura, Jymmang 31: Ka jingkyrduh um kaba shyrkhei bha hapoh ka Chokpot Alagre Community Health Centre (CHC) ha South Garo Hills district kaba la pynlong ïa ki paidbah ban bitar shla hadien ba ki seng bhalang na katei ka thaiñ ki la kynnoh ba ïa katei ka jaka ai jingsumar la lap ba ka la sah thylli ha ka por ba ki leit jngoh kynsan ha ka sngi Saitjaiñ.
Ki dkhot jong ki katto katne ki seng bhalang na ka thain Chokpot ki la iathuh ba ki la leit jngoh ïa ka CHC ban bishar ïa ka jingtreikam jong ka hynrei kim shym la lap ïa ki doktor, ki nurse ne kiwei kiwei ki nongtrei ka koit ka khiah kiba don hangtei, kaba la mih ka jingsngewkhia halor ka jingpynthut ïa ki jingshakri ha ka koit ka khiah ha katei ka thain.
Katkum katei ka kynhun, ka jingduna um kaba la slem bha ha katei ka jaka sumar ka la ktah jur ïa ka jingtreikam kaba man ka sngi, ha kaba la kynnoh ba ki nongtrei ka koit ka khiah ki sah jngai na ka kam namar ka jingbym don ki jingdonkam ba kongsan.
Ki sengbhalang ki la kynnoh ba u Medical Officer In-Charge jong ka CHC u Dr Winje Sangma u la ong ïa ki ba kin pynbeit ïa ka um dih bad ka um na ka bynta ki jingdonkam ba kongsan shwa ba ki jingshakri ha ka koit ka khiah kin treikam kumba ju long. Kane ka jingkynthoh ka la pynlong pat ïa ki nongshong shnong bad ki sengbhalang ban kynthoh tyngeh, kiba la buh jingkylli kumno ka jaka sumar sorkar ka lah ban bteng ban treikam khlem da ïoh ïa ki jingdonkam ba kongsan.
Na kane ka jinglong jingman ka la pynmih ïa ka jingsngewkhia ïa ki nongshong shnong kiba shaniah ha ka CHC na ka bynta ki jingsumar, ha kaba la ïathuh ba bun ki nongpang kim ioh ka jingsumar ha ka por kaba biang.
Ki sengbhalang ki la khot ïa kane ka jinglong jingman “kaba sngew shyrkhei bha” bad ki la ong ba ym lah ban ailad ïa ki jingshakri ba kongsan ha ka koit ka khiah ba kin hiar namar ka jingbym lah ban pynbiang da ki bor ba dei peit.
Ki la kyntu ïa ka sorkar Meghalaya bad ïa ka tnad ka koit ka khiah ba kin pynpoi noh mardor ïa ka umbam umdih sha katei ka jaka bad ban pynthikna ba kan treikam beit ïa ka CHC khlem da pynslem shuh.Ki kynhun ki la dawa ruh ban don ka jingkitkhlieh na ki bor ba dei peit halor ka jingpynthut.
Kane ka jingjia ka la pynpaw biang sa shisien ïa ka jinglong ba tlot jong ki lad jingsumar ha ki jaka nongkyndong jong ka jylla Meghalaya, khamtam ha ki jaka ba jngai ha kaba ki jingshakri ba kongsan ki dang ïai bteng ban duna.