Ba la shah leh donbor palat ka SAI ha thaiñ Mawsynram, dawa ki sengbhalang ban weng noh

Shillong Jymmang 31: Ki kynhun Sengbhalang na Mawsynram C & RD Block ba kynthup ïa ka FKJGP, HNYF bad ka HYC ki la pynpaw ïa ka jingsngewdiaw bad ki la dawa ba dei ban wengnoh ïa ka Sai Computer Ltd ka Company sam bording ha Mawsynram hadien ba ki lai Seng ki lah lap ïa ka jingtrei torti bad leh donbor kane ka Company bad kumjuh halor ka jingkynduh jingeh ki paidbah nongshong shnong ka thaiñ haba ïadei bad ka jingsam bording ha ka thaiñ.
Ha kaba ïadei bad kane haba kren sha ki lad pathai khubor na ka liang u Chairman jong ki lai Seng na Mawsynram u Bah Tyngshaiñ Rongsang u la ong ki lai Seng ki lah dep ban pynsngew sha u Myntri ba khmih ïa ka bording u Bah Metbah Lyngdoh ban dawa weng noh ïa ka Agreement pynbiang bording bad ka Sai Computer Ltd bad ban shim hi noh da ka sorkar haba ïadei bad ka jingsam bording ha ka thaiñ Mawsynram baroh kawei.
Shuh shuh halor kane na ka liang u Chairman u la pynpaw ka jingdon ka Sai Computer Ltd ha Mawsynram ka la ktah shibun eh ïa ki paidbah nongshong shnong ka Mawsynram ha kaba ka bai bording ka poi da ki hajar bad ka long ka bym ïahap shuh.
Kumta halor kane ka Seng ka kyrpad ïa ka sorkar khamtam sha u Myntri ba khmih ïa ka tnad bording ba ka dei ban weng noh ïa kane ka jingteh agreement bad ka Sai Computer Ltd haba ïadei bad ka jingsam bording ha Mawsynram bad kyntu ruh ïa ka Sorkar ba ka dei ban leh eiei noh bad ban weng noh shi syndon ïa ka Sai Computer Ltd na Mawsynram.
Katba na ka liang u Adviser ki lai Seng na Mawsynram u Bah kyllang Thongni u la ong lada ka sorkar ka dang sngap mynthi ym banse ban wan tur noh sha Secretariat ha ryngkat bad ki paidbah nongshong shnong ka Mawsynram ban dawa na ka Sorkar ba ka dei ban weng noh ïa ka Sai Computer Ltd ka Company kaba ai bording sha Mawsynram bad ban kyntu ïa ka Sorkar lyngba ka tnad bording ba kan pynïaid hi noh ïa ka bording ha Mawsynram bad ki thaiñ jong ka.