Nongstoiñ, Jymmang 29: La bun phew tylli ki snem ki paitbah ka thaiñ Myrïaw Eatern West Khasi hills district ki la angnud ban don ïa ka surok kaba paka na Mynriaw sha Nongum bad ka jingangnud jong ki ka la urlong bad ka jingpyntrei ïa katei ka surok ka la ïaid shait shait bad kaba sah mynta ka long satang ka jingkieng lyngba ka wah Tyrsung. U Bah G. Parïng uwei na ki riew rangbah na katei ka thaiñ haba ïakren bad u nongthohkhubor jong u Mawphor u la ong ba ka jingïoh ïa katei ka surok kaba lai kilomitar ka dei hadien ba ki paidbah ka Mawthadraishan constituency ki la jied ïa u bah Shakliar Warjri kum u nongmihkhmat bad dei lyngba ka jingtrei shitom jong u ba la ïoh ïa katei ka surok.
Nalor kata u la ong ruh ba lada la pyndep lut ïa katei ka surok kan long ka jingkyrkhu kaba khraw ïa ki paitbah nongshong shnong ka thaiñ namar baroh ki dei kiba im ha ka rep ka riang bad katei ka thaiñ ka dei ruh kaba sei soh bha ha kaba ka jingmih jong ki mar rep ka bun bha.
U bah Parïong u la ong ruh ba bun bah ki mar rep ba kham kongsan ba ki paitbah nognrep na katei ka thaiñ ki pynmih bad ki pynïaid ïew sha kiwei pat ki jaka ki long u soh saw, biskot, ki jhur, ki soh ba bun jait sohphlang bad kiwei kiwei. Nalor kata u la ong ba ka jingïoh ïa katei ka surok kan pynsuk shibun ha ka kit ka bah bad kan kyntiew ruh ïa ka ïoh ka kot, ka kamai kajih jong ki paitbah nongshong shnong namar ka surok hi ka dei u bud lum jong ka kami kajih bad ka ïoh ka kot. Ha kajuh ka por u la ong ba kawei pat ka surok kaba la sdang ban pyntrei mynta ka dei na Myrïaw shaduh Nongriat bad katei ka surok ka dei ruh kaba kongsan bha namar ka dei kaba pynïasoh ïa ki shnong kiba jong ka West Khasi hills bad ka Eastern West Khasi hills.
Ha kaba ïadei bad ka jingïoh ïa kitei ki surok u la ong ban a ka liang ki paitbah ka thaiñ rimen kim lah khlem da ai khublei kyrpang ïa u MLA uba la trei shitom met bad mynsiem bad uba don ruh ka jingkitkhlieh na ka bynta ban wanrah ïa ka roi ka par ha ka constituency hi baroh kawei.
