Shillong, Jymmang 29: Ka Nongkseh SSCC ka la shim ïa sienjam kaba khraw ha ka jingïakhun jong ka ban rah ïa ka nam lahduh ha ka 5th Meghalaya State League da kaba pynliem noh ïa ka Rymbai Shkenshynriah SC da 3-0 ha ka Semifinal ba nyngkong ha madan First Ground-SSA Stadium, hynne ka sngi Thohdieng.
Kane ka jingïalehkai ka la long ha khmat ki paid nongkyrshan kiba la pyndap ïa ki jaka shong hapoh madan, kynthup ïa kiba bun ki nongkyrshan kiba la wan na ka bynta ka Shkenshynriah.
U Arlangky Nongsiej (39′) u la pynkhihjar nyngkong ha ka kylla step ban pynïakhlad ïa kine ki arliang bad ka Nongkseh ka la tehlakam pura ïa ka jingïalehkai ha ka kylla miet da kaba thep sa ar tylli ki kol lyngba u Chesterpaul Lyngdoh (75′) bad u Hardy Cliff Nongbri (86′).
Watla ka jingïoh thep kol ka duna hynrei ka jingïakhun ka la long kaba itynnad ha kaba ka Shkenshynriah ka la lah ba kan ïalehkai stet shuwa ba ka kol kaba lai jong ka Nongkseh kan pynjemkhnap ïa kane ka kynhun na East Jaiñtia Hills.
Na ka bynta ka jingïalehkai ba kyrpang ha baroh kawei ka jingïakhun, u Hardy u la shah jied ban khur ïa ka khusnam Hello Meghalaya Man of the Match bad ïa ka cheque kaba Rs 10,000 ryngkat ka memento na u Director ka NEIGRIHMS, u Dr Nalin Mehta.
Mynta ka Nongkseh kan jam sha ka phainal ha kaba kan ïakhun pyrshah ïa ka nongjop ha ka jingïalehkai semifinal kaba ar hapdeng ka Langsning FC bad ka Shillong Lajong FC, ka ban long mynta ka sngi. Kane ka semi final kaba ar kan long ha ka por 6 baje janmiet ha SSA Stadium.
Ka Langsning ka la pyndep hakhlieh duh jong ka Group B ha ka Quarterfinal stage, da kaba jop san sien bad rem shi siem. Ha ka wat ïakhun ba nyngkong ka la rung lyngba ka Group F bad ka la jop ha ka Round of 16. Ka Langsning ka la poi tang shi sien sha ka semi final ha ka MSL, kaba dei ha ka sienjam ba nyngkong ha u snem 2017, ha kaba ka kynhun ka la shah rem noh ha ka Tynrongmawsaw SC.
Katba ka Shillong Lajong, ka la rung lyngba ka Group E ha ka wat ïakhun ba nyngkong ban jam sha ka Round-16 shuwa ba kan hap ha kajuh ka Group ryngkat ka Nongkseh ban ïakhun ïa ka quarterfinal stage. Mynta ka Lajong ka sah satang marwei kum ka lahduh barim ha kane ka lympung, hadien ba ka la rah ïa ka nam lahduh ha u snem 2019. Ki la wan ba ar ruh ha ka MSL 4 ha u snem ba ladep.
