SHILLONG, Jymmang 29: Ka Meghalaya State Olympic Association ka la pdiang sngewbha ïa ka Dr. P. T. Usha, President ka Indian Olympic Association, ha ka jingwan jngoh jong ka ïa ka nongbah Shillong hynne ka sngi Thohdieng (29 tarik Jymmang 2026).
Kiba la pdiang sngewbha na ka liang ka MSOA ki long u bah John F. Kharshiing, Working President; u bah EMH Passah-dkhot ka MSOA; ka kong Matsiewdor War Nongbri-Vice President; u bah Pynbiang Laloo-Joint Secretary; bad u bah Ksan Kupar Treasurer.
Ha kane ka jingïalang la ïadon lang ruh u Capt. Ajay Narang, Executive Assistant sha ka President ka Indian Olympic Association.
Na ka liang ki nongïalam ka MSOA ki la pynpaw ïa ka jingsngewnguh ïa ka Dr. P. T. Usha namar ka jingïarap bad jingïalam jong ka ban pynkhlaiñ ïa ka Olympic movement bad ka jingïaid shaphrang jong ka kam ïalehkai ha Meghalaya bad ka thaiñ Shatei Lam Mihngi.
La ïoh ruh ban ïakren halor ka jingïatreilang ban kyntiew ïa ki nongïalehkai, ka jingpynbha ïa ki jingtei bad ban pynthikna ïa ka jingïaid beit jong ka 39th National Games Meghalaya 2027.
Ka Association ka la pynskhem biang ïa ka jingangnud ban ïatreilang bad ka Indian Olympic Association, ka Sorkar Meghalaya bad baroh kiba don bynta khnang ban pynlong ïa ka Meghalaya kum ka jylla kaba paw ha ka liang ki jingïalehkai ha ka ri India.
