Buh u kyrtong ka NPP hakhmat eh ïa ka Civil Sub Division ha Mawsynram bad ki kam jngohkai pyrthei

Shillong, Jymmang 28: U Dr DRL Nonglait uba dei u kyrtong ka National People Party (NPP) ha ka election shiteng samoi u la pynpaw ba lada u ïoh ka jingjop ha kane ka MP election un ïaleh ban shim khia ban pynurlong ïa ka jingangnud kaba la slem bha jong ki paidbah ka Mawsynram kata ban kyntiew noh sha ka kyrdan Civil Sub Division.
Haba kren ha ka jingialang ialap election u Dr Nonglait u la ong, Ka Civil Sub Division kadei ka mat jong ka sorkar hynrei u la pynpaw ba ka long kaba donkam ban don ka jingiatrei lang hapdeng u MP bad ka Sorkar jylla ban pynurlong ïa ka jingthmu ki paidbah.
“Lada ngan jop ngan ïarap sha Delhi ban ïakren halor ka mang tyngka khnang ban pynbit pynbiang ïa ki jingdonkam jong ka Civil Sub Division shwa ba kan trei kam pura” ong u Dr Nonglait.
Shuh shuh u Dr Nonglait u la pynpaw ba lada ngi ïaid da ka sur kaba beit bad da kaba khuid un ym don ki ban kyntait ban ïatrei lang la ka long ha kano kano ka bynta ruh.
Haba khein ïa ka Mawsynram bad ka Sohra kiba dei ki ar tylli ki shnong kiba jur slap tam ha ka pyrthei u Dr Nonglait u la pynpaw ka jingsngew bynniaw namar ba wat tang kawei ka kharkhana shna shatri ruh ym don, kumta u la kular ba lada u jop un ïaleh ban wanrah ki song pisa na ka bynta ban plie lad ïa ki khun samla.
Shuh shuh u Dr Nonglait u la pynpaw ba ka dong ka thain Mawsynram ha kip or kiba mynshwa kadei ka kper soh kper syntiew, hynrei mynta bun kila ïap khlam lut, kumta donkam ban plie da kiwei ki lad ki lynti kum ha ka liang jong ka kam jngohkai pyrthei khnang ba ki paidbah kin ïoh ka kamai kajih.
U Dr Nonglait u la pynpaw ba naduh u snem 2018 ba shim ka sorkar MDA kala pyrshang bun bha ki lad ki lynti ban weng ïa ka jingeh jong ki paidbah nongshong shnong ka jylla baroh kawei.
Ha kaba ïadei bad ka thain Mawsynram, mynta ka surok na Mawphlang shaduh Weiloi kala bha bha, ym kum ha ki por mynshwa ba nga dang hikai ha ka Border Area College ha Mawsynram ha u snem 1998 kane ka bynta jong ka surok kam ju bha, mynta pat ka lah bha bad kane kadei ka jingpyrshang jong ka sorkar, u la ong.
Ha kaba ïadei bad ki kynhun jingngeit bapher bapher kiba don hapoh ka jylla u Dr Nonglait u la ong, ngi hap ban burom mar kylliang namar ba ki don la ki jong ki bynta jong ki ban kyntiew ïa la ki don ki thain.
Halor ka jingshah niew bein ba man ka por ki khun samla kiba trei shabar ka jylla u Dr Nonglait u la ong, “Ka jingshah niew bein ki paidbah ka NE ha ki bynta ka ri India ngan shim ïa ka jingkit khlieh na ka bynta ki samla ba pule bad trei shabar lada nga jop ha kane ka election.
Kumta u Dr Nonglait u la wer ïa baroh ki paidbah nongthep vote da kaba ong ba um dei tang u kyrtong jong ka NPP hynrei u dei jong baroh ki paidbah nongthep vote ba kin kyrshan tyngeh ïa u ban poi sha ka thong.
Ha kane ka sngi la wan ban donlang ruh u Bah Charles Marngar u MLA ka Mawhati, ka Kong Grace Mary Kharpuri MDC ka Nongshkem bad President ka NPWF, u Bah Alvin Sawkmie u MDC ka thain bad u Bah Himalaya M Shangpliang nalor kiwei pat.