Lada ïoh bat ki seng riewlum ïa u lakam synshar, ki nongtrei sorkar kin duh tulop lut: Charles

Shillong, Jymmang 28: U MLA ka Mawhati u Bah Charles Marngar u la kop ba hapoh ka jylla Meghalaya yn ym lah ki seng riewlum ban synshar ïa ka jylla bad lada jia ba ki seng riewlum kin synshar kan poi ka por ba kin duh tulop ki nongtrei sorkar hapoh ka jylla.
Ïa kane u Bah Charles u la pynpaw ha shnong Mawsynram ha ka por ba leit ïalap election ïa u kyrtong ka NPP na ka bynta ka election shiteng samoi u Dr DRL Nonglait ban pan ka jingkyrshan na ki paidbah ka Mawsynram Constituency.
U Bah Charles u la ong, u Dr Nonglait un ym donkam shuh ban leit rah dorkhas sha Delhi, hynrei mynta ngin phah ban ïa said ha Parliament ha kaba ïadei bad ki mat ki jura jong ka jylla.
Haba kren halor ka sain pyrthei hapoh ka ri India ne ka Politic in India u Bah Charles u la ong, lada phi don ha ka liang pyrshah ym don ban sngap ïa ka sur jong phi, hynrei u Myntri Rangbha jong ngi u don jingiadei ba jan bha bad ka sorkar india bad lada ngi phah ïa u Dr Nonglait ngim artatien ba ki mat ba ka jylla ka kwah, ngam artatien kin urlong.
U Bah Charles u la ong haba phai ïa ka jinglehbha jong ka sorkar u la iathuh ba ka sorkar ka lah leh bha bha ha baroh ki liang, hynrei kum ki briew jan baroh kim don ka jingsngewnguh ïa ka jingleh bha bad lada phi don ka jingsngewnguh pynjop ïa u Dr Nonglait.
Ha kawei ka liang u MDC ka Mawsynram Constituency u Bah Alvin Sawkmie, hadien ba ka sorkar kala khot tender na Weiloi shaduh Phlangwanbroi u la pynpaw ba ka dong ka thain Mawsynram kan sa kylla long ka jaka jngohkai pyrthei ka ban khring bha namar bal ah bha ki surok.
Kumba long baroh shi katta ki paidbah kiba wan kai sha kane ka dong ka thain bunsien ki ju ud ha kaba ïadei bad ka surok, hynrei mynta ba ka sorkar kala mang haduh 180 klur kan sa khring bha ïa ki nongwan jngohkai pyrthei, u la ong.
Haba kren ha ka jingialang ïalap election ïa u Dr DRL Nonglait ha iew Mawsynram u Bah Alvin u la ong, “Ka thain Lawbah, Mawlyngbna ba don ki jaka jngohkai pyrthei kan kiew bha ha kine ki snem ban wan bad ynda la dep ka surok ki briew kiba wan ruh ki suk ha ka leit ka wam”.
“Ym pat don kum kane ka sorkar ba tang hapoh phra snem ba synshar ïa ka jylla, ka dong ka thain Mawsynram kala ioh bun ki jingkyrkhu ha kaba ïadei bad ki surok ki syngkieng” ong u Bah Alvin.
Ha kaba iadei bad ka iew ki nongrep ne kata ka farmers market, u Bah Alvin u la iathuh ba ha ka por ba dang long myntri sorkar u James K Sangma hadien ba u la leit ban ud ban nam tang khyndiat por u la pynioh bad ka kam kala iaid sha khmat bad shen yn sa plie noh ïa ka.
Halor ka jingkylla ka ktien Khasi kum ka ktien Sorkar u Bah Alvin u la ai jingïaroh ïa u Dr DRL Nonglait uba long kum u nongprat lynti bad u la ai ruh ka jingïaroh ïa ka sorkar halor ka jingrung ka ktien Khasi bad Garo ha ka CBSE.
U Bah Alvin u la khot bad wer ïa ki paidbah ban kyrshan ïa u kyrtong ka NPP khnang ba un ioh ka jingjop ha kane ka election MP shiteng samoi.