Ban pynkupbor shuh shuh ïa ka Khyrnit ba Hynriew, ka thong ba hakhmat eh u kyrtong MP ka UDP

Shillong, Jymmang 28 : U kyrtong MP jong ka UDP na ka bynta ka elekshon MP shiteng samoi u Bah Vivanstone G Kharngapkynta ha ka sngi Palei u la ong ba ka Khyrnit ba Hynriew ka dei ka atiar ïada kaba khlaiñ tam ïa ki Khasi bad Jaintia Hills bad kumta donkam bad dei ban “pynkhlaiñ shuh shuh ïa ka.
Haba kren hadien ba la pynbna ïa u kum u kyrtong jong ka party, une u Nongïasaid aiñ ba la rangbah bha ha ka jylla u la ong ba lada u shah jied kum u MP, un ïakhun borbah halor kane namar u kwah ban pynkhlaiñ bad aibor shuh shuh ïa ka Khyrnit kaba Hynriew jong ka Riti Synshar jong ka Ri namar kane ka dei ka stieh ïada kaba khlain ïa ka Jaidbynriew.
“Haba ngi don ïa ka Sixth Schedule, haba ngi don ïa ki District Council, ngi dei ban trei shitom ban pynkhlaiñ shuh shuh ïa ki District Council,” u la ong.
Ha shwa jong kane, u Bah Vivanstone u la ong,” Ynda nga la shah jied kum u MP, namar nga tip bha ïa ka rukom treikam jong ka District Council, ngan trei shitom na ka bynta ki District Council. Haba nga trei shitom na ka bynta ki District Council, ka mut ba ngan trei shitom na ka bynta ki Hima jong ki Syiem, ki Wahadadar bad ki shnong, namar nga shem ba tang lyngba ka District Council, lyngba ki Syiem bad ki shnong, ngi lah ban pynkhlaiñ ïa ka jingïatylli paidbah trai ri.”
Ha kajuh ka por u pan ruh ka jingkyrshan kaba borbah na baroh ki 12 ngut ki MLA jong ka party bad kumjuh ki MDC ryngkat ka jingtreilang ki nongïalam jong ka party ha baroh ki constituency jong ka Shillong Parliamentary Constituency.