Ka Bor Pynïaid District ka Ri Bhoi ka lam khmat ha kaban kyntiew ïa ka pule puthi ban pynkup bor ïa ki samla lajong
Shillong, Jymmang 27 : La bun snem, ka jingphohsniew ban ïoh ïa ki kam sorkar pdeng ba kynsai ka long kaba eh bha na bynta kiba bun ha Ri Bhoi, namar ba donkam ban leit sha ki jaka ai jinghikai (coaching hubs) kiba rem dor ne namar ka jingduna ki lad jingïarap ha la shnong. Kata ka jingduna mynta la pyndap da ka Bor Pynïaid District jong ka Ri Bhoi, hapoh ka NITI Aayog Aspirational District Program, da kaba pynmih ïa ka Project Aspire – ka rynsan digital kaba pynkhreh kyrpang ban pynlong ïa ki samla lajong ban long kiba tbit ban ïakhun ïa ki kam SSC, Banking, Railways, bad Intelligence Bureau (IB).
Kane ka project, kaba la plie paidbah da u Myntri Rangbah uba burom Shri Conrad K Sangma, ka pyni ïa ka jingkylla kaba khraw sha ka jingpynkup bor
lyngba ka teknoloji. Hapdeng kiwei pat ki prokram, ka Project Aspire ka ai ïa ka “Free Govt Job Prep Kit” kaba kynthup ïa ki jinghikai live man la ka sngi bad ka test series ba khlem pud kaba don palat 10,000 tylli ki jingkylli beit beit ha ka mobile, ban pynthikna ba ka jaka shong jaka sah kam long shuh ka jingkhanglad ïa ka jingjop.
Haba pynshai halor ki jingeh kiba ki samla ki kynduh, u DC ka Ri Bhoi u Shri Abhilash Baranwal u la ong ba wat la ki khynnah pule ha kane ka thaïn ki khlaiñ ha ka General Knowledge bad Phareng (English), ki ju duna ha ki bynta ba ïadei bad ki jingkheiñ. “Ha ki por ba ngi pynlong coaching mynshuwa, ngi la shem ba kam don ka jaka ai jinghikai (coaching infrastructure) hangne, bad ki khynnah ki shem jingeh bha ha ka reasoning bad mathematics,” la pynshai u DC. “Namar kane, kim lah ban ïakhun tbit ha ki eksamin jong ka ri. Mynta ngi la ïatreilang ban pynkhreh ïa ki lynnong pule ba ryntih, kynthup lang ki live class bad ki jingai jingmut (feedback) lyngba ka AI kiba ïathuh thikna ha ki khynnah pule haei ki donkam ban pynbha shuh shuh, ban pynthikna ba ki la long shisha kiba la khreh bha na bynta ki eksamin”.
Nalor ka thong ban ïoh kam ïoh jam, ka sorkar district ka pynkhlaiñ ruh ïa ka nongrim jingnang jingstad jong ka district. Kum ka sienjam ban kyrshan ïa ki pateng samla ban sa wan, ka district ka pynbiang lad ban ïoh ïa ki nonghikai shimet (personal teachers) lyngba ka AI kiba treikam 24X7 na bynta ki khynnah skul, ban pynthikna ba ki khynnah kiba dang rit ki ïoh ka jingkyrshan man la ka por ban tei ïa ka jingsngewthuh kaba shai kaba donkam na bynta ka jingjop ha ki jingïakhun ha lawei.
Ki samla kiba la biang ki kyndon kiba la pyndep ïa ka Class 12 ki lah mynta ban register na bynta kane ka prokram ha ribhoiexamprep.com.