Nongpoh, Jymmang 26: Ka bor district jong ka Ri-Bhoi haka jingtreilang bad ka Startup Inda bad DPIIT mynta ka sngi kila pynlong ïaka workshop bala tip kum ka TEJAS (Transforming Entrepreneurial Journeys Across States & Districts) ha Parish Hall Nongpoh ban kyntiew ïaki nongseng kam lajong haka district.
Ha kane ka workshop la wan ruh ban shim bynta da ki nongsengkam lajong na kylleng ki shnong jong ka Ri-Bhoi haka jingdonlang ki heh ophisar naduh u Chaitanya Awasthi, SDO (Civil) Patharkhmah Sub-Division, ka E. N. Marak, Assistant Commissioner bad kiwei kiwei kynthup ki nongmihkhmat naka Startup India bad DPIIT kiba la ai ka jingbatai kaba bñah halor ka Startup India bad ka thong jong ka TEJAS naka bynta ka jingmyntoi jong ki nongsengkam kiba la iohpdiang ruh ïaki jingïarap bapher bappher naka sorkar ban kyntiew ïaka kam jong ki.
Naka liang ki nongsengkam lajong ha kane ka sngi kila pynpaw ruh ïaki jingïaid lynti jong ki bad ki jingeh kiba ki ïakynduh bad kumno ka sorkar ka ïarap ïaki ban kyntiew ïaka kam kaba kila sdang khnang ba kan long ka jingai mynsiem bad ka jingmyntoi ïaki.
Haba kren sha ki lad pathai khubor naka liang u Chaitanya Awasthi, SDO (Civil) Patharkhmah Civil Sub-Division u la ong ba palat 250 ngut ki nongsengkam kila iohlad ban tip shaphang ki skhim naka sorkar India bad kumjuh ruh ka sorkar jylla ban kyrshan bad ïarap ïaki kam ki jam jong ki kiba kynthup ruh naka CM ELEVATE bad PRIME ha kaba bun na ki ki la pynpaw ïa ka jingkmen namar ka jingïaid shaphrang jong ka kam khamtam ban weng ïaki jingeh haka jingïaid lynti jong ki ban kyntiew ïa ka ïoh ka kot.
