Tuid ki paidbah sha ka jingïalang u Dr. D.R.L. Nonglait ha shnong Mookaiaw bad Shangpung

Shangpung, Jymmang 26: Wat lada ka Election Commission of India kam pat pynbna tarik ban pynlong ïa ka by-election jong ka Shillong Parliamentary Seat kaba thylli ha ka jingkhlad shiteng por jong u Dr. Ricky J. Synkon, hynrei pat ki Candidates ki ban ïakhun ïa kane ka shuki, ki la sdang ban ïaid ban pynithuh paidbah ïalade na kawei ka shnong sha kawei ka shnong bad na kawei ka District sha kawei ka District bad na kawei ka L.A Constituency sha kawei ka L.A Constituency.
U Dr. D.R.L. Nonglait, u Candidate jong ka National People Party (NPP) ha ka 25/05/2026, u la hiar sha ka 4 Mowkaiaw Constituency bad pynlong jingïalang ha Madan Mynkoi Mowkaiaw. Wat hapdeng ka jingpynwit jong u slap, hynrei pat da ki hajar tuid ki paidbah sha ka jingïalang pynithuh paidbah u Dr. D.R.L. Nonglait, ym tang ban wan sngap ne peit ïa ka dur ka dar jong u Dr. Nonglait, hynrei ban kyrshan tylli ïa u ha kane ka jingïaleh jong u ïa kane ka by-election ka ban sa long shen ne kham hadien.
U Dr. D.R.L Nonglait haba kren ha kane ka sngi, um shym la kynthoh briew lane ïa kano kano ka Party, ka jingkren kaba long beit ïa ka jingïeng ïaleh jong u ïa kane ka by-election bad ka jingkren kaba la pynsngewbha, pynsgewtynnad ïa ki nongwan jingïalang bad kaba ktik ïa ki nongwan jingïalang kiba ym dei na ka Party NPP ban ai ka jingkyrshan ïa u Dr. Nonglait.
Ki nongkren kiba pan ïa ka jingkyrshan ki paidbah nongthep vote ïa u Dr. D.R.L. Nonglait, ki kynthup ïa u Dr. Henri Lamin Ex- MLA & Ex-Education Minister, Ma Comingone Ymbon MLA bad u Ma Sniawbhalang Dhar Symbud Myntri Rangbah ka jylla Meghalaya.
La ïoh ïa ka jingkren pdiang burom ïa u Dr. D.R.L. Nonglait bad ïa baroh ki nongwan jingïalang da u ma Warmanship Shadap MDC ka Mowkaiaw MDC Constituency bad ïa ka jingïalang la pynïaid da u ma M.Suting, President ka NPP ka 4 Mowkaiaw Assembly Constituency.
Hadien ka jingïalang ha Mowkaiaw, u Dr. D.R.L Nonglait, u la hiar sha Shangpung, kawei na ki shnong kaba heh ha Rilum Jaintia, ka KUT ba khlaiñ jong ka KOT bad pynlong ïa ka jingïalang paidbah ha Ïinghall ka Shangpung Pohshnong, ha kaba u Dr. Nonglait u la ïoh ïa ka jingpdiang burom kaba kat ka jingpdiang burom na ki paidbah.
Ha Shangpung la ïoh ïa ka jingkren pdiang burom ïa u Dr. D.R.L Nonglait (Candidate jong ka NPP) da u Ma Lucky Ymbon (NPP President ka 3 Raliang Assembly Constituency), nangta bud sa ka jingkren na u ma Shanborlang Dhar (President ka NPYF ka 3 Raliang Assembly Constituency), kong Dahun I Mon Wan (Sein-Manbei Shangpung Moolibang), Dr. Henry Lamin Ex-MLA, ma Comingone Ymbon Local MLA bad u Bah Hamletson Dohling (NPP State working President).
U Dr. D.R.L. Nonglait NPP. MP Candidate haba kren ha kane jaka ruh um shym la kynthoh ïano ïano lane ïa kano kano ka Party, hadien ka jingpynithuh ïalade bad beit beit sha ka thong kaba u ieng ban ïaleh bad u kyrpad (Appeal) ïa ki Paidbah Nongthep vote jong ka 3 Raliang Assembly Constituency ba kin kyrshan ïa u ha kane ka by-elekshon sha ka ïingdurbar Lok Sabha kaba u ïeng ban ïaleh.
Ïa ka jingïalang la pynïaid da ma Leadingstar Niang, Waheh Shnong ka Shangpung Pohshnong bad ïa ka Vote of thanks la ai da u ma Nidayoo Papang, NPP General Secretary ka 3 Raliang Assembly Constituency.