Ka VPP ka “Pynap Borti” ha ka por election katba u Nongïalam u dei u Crorepati kat kum ka Affidavit ? Kylli ka HNLC

Shillong, Jymmang 26 : Ka Hynniewtrep National Liberation Council (HNLA) ka la kynnoh ïa ka Voice of the People Party (VPP) halor ka “jingïaid khongpong kiba paw pylleiñ pynleiñ” hapdeng ka jingïaid ïalap elekshon kum ka party kaba duk bad ba ïeng na ka bynta kiba duk katba ki nongialam ha ka jingpynbna ïa ka jingdon spah ha ka affidavit sha ka Election Commission naduh u snem 2023 ki pyni ba dei ki crorepati.
Ha ka kyrwoh ba pynmih ha ka sngi Nyngkong, u General Secretary ka HNLC Bah Sainkupar Nongtraw ula ong ba katba u President ka VPP bad MLA ka Nongkrem Ardent Miller Basaiawmoit ula pan synñiang da ka “Pynap Borti” ha man ba ïalap elekshon, ka affidavit jong u pat ka pyni ïa ka jingdon spah ba palat 1.49 klur tyngka.
“Ka jingkhmih bniah ïa ki affidavit ba la aiti sha ka Election Commission ka pyni ïa ka jinglong khongpong ba paw pylleiñ pynleiñ hapdeng ka dur jong ka VPP ba pyni hakhmat u paidbah bad ka jingdon spah ba shisha jong ki Nongïalam” ong u Bah Sainkupar.
“Katba u President ka VPP Ardent Miller Basaiawmoit u ïaid ïalap elekshon ryngkat ka “Pynap Borti” bad kyntu ïa ki nong shong shnong kiba bun ki dei ki nongbylla sngi bad nongrep, ba kin synñiang ïa ka pisa ba ki kamai da ka umsyep, ka jingdon jingem jong lade pat bala pynbna ka long haduh 1,49,15,089 klur tyngka” ula bynrap.
Kat kum ka jingong u Bah Sainkupar, ka affidavit u Bah Ardent ka pyni ïa ka jingdon jingem ba 1,49,15,089 tyngka kynthup ki nongkynti bym lah ban pynkynriah ba 1.35 klu tyngkar- ka ïingsah ba 1 klur tyngka ha Laitkor bad ka jaka ba 35 lak tyngka, ki kali ba kynthup ïa ka Jeep, Bolero bad Royal Enfiels ba shongdor baroh lang haduh 6.7 lak tyngka, ki jingdeng ksiar ba 1.92 lak tyngka, bad ka pisa ha Bank ba 6.15 lak tyngka. Ka affidavit ka pyni ruh ba um don ram don shah bad siew income tax.
“Ka kbubor hi ka long ka bym bakla, “ Ngi dei kiba duk. Ngim don pisa. Ngi shaniah ha phi, ki paidbah. “Hynrei une u juh u briew uba bat ïa ka borti u don ïa ka ïing ba lai mala ba shongdor 1 klur tyngka artylli ki jaka ha Shillong ba 35 lak tyngka..bun tylli ki kali bad jingdeng ksiar, bym don ram don shah” ula ong.
U Bah Sainkular ula kdew ïa ka manifesto jong ka VPP ba pynlait ha ka 15 tarik Rymphang 2023, kaba kular “rat dyngkhong ïa ka jingduk na ka imlang sahlang bad ka Jylla” ha ryngkat ka jingshngaiñ, ka jingsuk, ka jingkiew shaphrang bad ka jingpynneh pynsah ïa ka riti dustur.
“Ka jingkylli kaba dei ban kylli, hato ka VPP ka ïakhun pyrshah ïa ka jingduk lane ka ïoh jingmyntoi lane ïoh nong na ka” ula ong.
Ula kdew ïa ka jingbishar bniah jong ka North Easten Hill University (NEHU) ïa ka jingïaid ïalap elekshon ka VPP ha u 2023, kaba pynpaw ba ki jingïalang ka party ki long “kiba la pynlong khlem ki jingpynkhreh pynkhrum bad jingpynpaw ïa kano kano ka jingkhraw” bad ba “ki paidbah kila noh synñiang da ka pisa na ka bynta ki jingïalap elekshon ka party bad wanrah ruh ïa ki kali bad pyndonkam ka party”.
“Kane ka pynthikna ba ka buit “pynap borti” ba ki riew paidbah kin synñiang ïa la ka pisa bad ka kali ban bei tyngka ïa ka jingïaid elekshon, katba ki nongïalam ïalade ki pyni ba kim don pisa” ong u Bah Sainkupar.
Une u Nongialam ka HNLC ula bynrap ba laingut na ki saw ngut ki MLA ka VPP ki dei ki crorepati lane jan long crorepati kat kum ki aafidavit jong ki.
U Bah Ardent na Nongkrem u don 1.49 klur tyngka, u Bah Heaving Stone Kharpran na Mawryngkneng u don 1.09 klur tyngka, u Bah Brighstarwell Marbaniang na Mawlai u don 41.85 lak tyngka bad u Bah Adelbert Nongrum na North Shillong ula pynbna 13.61 lak tyngka. Baroh 4 ngut ki MLA kila pynbna 0 tyngka ka jingïoh kamai na baroh ki snem mang tyngka.
“Lada dei shisha ba kim don jingkamai, mano ba pynbiang pisa ïa ka rukom im jong ki? Nangno ki ïoh pisa ban thied ïa ki nongkynti, shna ïa ki kali, bad nangno ka wan pisa ha jingpynlut ïalap elekshon” ula buh jingkylli.
U Bah Sainkupar ula ong ba tang u Bah Adelbert Nongrum napdeng ki MLA ka VPP uba pyni ba ka jingdon pisa ka ïahap bad ka jingkren ka party. “Da tang 13.61 lak tyngka ha ka jingdon jingem, ym don jaka, ym don ïing, bad tang kawei ka kali scorpio 2014, u dei tang ma u na ki MLA ka VPP uba lah shisha ban kam ba u mihkhmat ïa kiba duk. Ki lai ngut kiwei pat kynthup u President Ardent Basiawmoit kim lah satia” ula ong.
“Ki paidbah ka Meghalaya ki dei hok ban ïoh ïa ka jingleh hok, ym ka drama pynpaw nam ka VPP kam lah ban leh ïa baroh ar. Kam lah ban kam ba ka dei ka party na ka bynta kiba duk katba u President bad ki Nongïalam ki dei napdeng ki riew saiñ pyrthei ba riewspah ka Jylla. Ka borti ka lah ban thylli, hynrei ki pla jong ki nongïalam kim thylli” bynrap u Bah Sainkupar.