Leit ïashim bynta u Lamphang ka Ïing Dorbar thaw aiñ hapoh ka Canadian Parliamentary Seminar

Shillong, Jymmang 26: U Lamphang ka Meghalaya Legislative Assembly, u Thomas A. Sangma, u la leit ïashim bynta ha ka Canadian Parliamentary Seminar ba 16 kaba la pynlong ha Ottawa, Canada, naduh ka 25 haduh 29 tarik, Jymmang 2026, ha kaba ïa katei ka jingïalang la pynïaid da ka Ïing Dorbar thawaiñ jong ka Canada.
Ka phang pdeng jong kane ka jingïalang mynta u snem ka long, “Ki Ïing dorbar thawaiñ ha kane ka spah snem ba 21: ka jingthaw thymmai bad ka jingpynkylla ïa ka synshar khadar,” kaba la wanrah ïa ka jingïalang lang jong ki nongïalam bad ki ophisar ka Ïing-dorbar ban bishar bniah halor ki jingeh bad ka rukom treikam ka hima synshar kaba dang ïaid shakhmat.
Ha kane ka jingïalang, la ïakren halor ki phang ba kongsan, kynthup ïa ka jingpeit bniah ïa ka rukom synshar khaddar jong ka ri Canada, ka bynta ba kongsan jong ka Commonwealth Parliamentary Association (CPA).
Ka jingleit ban ïa shim bynta ka long ban pynïadei ïa ki samla ha ka jingsynshar paidbah, jingpynkiew kyrdan ïa ki kynthei ha ka bor synshar ka Ri, ka rukom pynïaid shnong ne treikam synshar ba mynta, ki lad jingïada bad ki atiar ban pynkylla nongbah ïa ka sorkar, ka jingpynïadei bad ka riti ka dustur bad ka lad pathai khubor bad kiwei kiwei ki jingai jingtip.
La synran lang ïa u Thomas A. Sangma da u Malthus S. Sangma, Secretary, Meghalaya Legislative Assembly, bad u bah Raja K. Kharpuri, Deputy Secretary, Meghalaya Legislative Assembly.
Ka jingïashim bynta jong ki nongmihkhmat ka Meghalaya Legislative Assembly ha kane ka jingïalang ka long ka jingkhmih lynti ban ai jingmut ba kordor halor ki rukom treikam bad ki lad thymmai jong ka Ïing dorbar thawaiñ, kaba pynkhlaiñ shuh shuh ïa ka synshar khadar ri bad ka rukom treikam ki nongbishar ha ka Jylla.