Shillong, Jymmang 26 : Ka Hynniewtrep National Liberation Council (HNLC) ha ka Lah Sngi U Blei ka la pynrem jur ïa ka jingsospon ka Khasi Hills Autonomous District Council (KHADC) ba synshar ka Voice of the People Party (VPP) ïa u Syiem ka Hima Mylliem bad shim ïa ka kum ka sienjam “ban pyniap ïa ki nongsynshar” ne kata political assassination ba la leh da ki lynti jong ka aiñ.
Ha ka kyrwoh, u General Secretary ka HNLC Bah Sainkupar Nongtraw ula kyntait ïa ka jingwer u President ka VPP Ardent Basaiawmoit ban nym khmih ïa ka jingtreikam ka KHADC lyngba ka jingpeit niam.
“Ka HNLC ka kyntait ïa ka jingkren u President ka VPP Ardent Basaiawmoit, uba maham pyrshah ïa ka jingpynman ïa ka jingtreikam ka KHADC lyngba ka jingpeit niam. Kane kam dei ka jingkhot hok ïa ka jingïatylli, hynrei ka jingpyrshang ban khring shawei pat ïa ka jingmut jingpyrkhat na ki kam jong ka KHADC ba lamkhmat ka VPP pyrshah ïa ki bor treikam na la tynrai u trai ri trai muluk” ula ong.
“Ka HNLC ka pynrem ïa ka jingsospon ia u Pa’iem Ainam Manik Syiem da ka KHADC ba ïalam ka VPP bad shim ïa kine ki kam baroh kum ka jingpyniap ïa ki nongsynshar bala leh da ki lynti ka aiñ” ong u Bah Sainkupar.
U kynnoh ba ïa kane ka jingsospon la pynbit da ka jingthung mardor ïa u Acting Syiem uba dei u Khristan, kaba pyni ïa ka buit treikam kaba don eiei ba kham heh.
“Tang mar ïa sospon ïa u Ainam Manik Syiem, ka KHADC ka la thung mardor ïa u Alban Fedrick Syiem kum u Acting Syiem. U Alban Fedrick Syien u dei u Khristan. Ka rukom leh ka long kaba shai mynta. U Syiem ba dei na ka Niam Khasi ula shah weng khlem da don ka rukom bishar kaba shonghok bad ba khlem shah liang, bad la thung ïa u Khristan ha ka jaka jong u. Kane ka la jia ha Hima Mylliem bad kum ki juh ki jingtuklar la pyrshang ban leh mynta ha Hima Sohra. Kane kam dei kaba shu jia ryngkhat. Kane ka dei ka buit treikam” ula ong.
U Bah Sainkupar ula kdew ba u Bah Ainam Manik Syiem u dei u Syiem uba saw ban shah sospon ha ka KHADC bad ka United Khasi Jaintia Hills Autonomous District Council kaba rim.
“Ka jingïai pyndonkam ïa ka bor ban sospon pyrshah ïa ki Khlieh Nongsynshar ka pyni ïa ka rukom long kaba idon jingma bha ha kaba la pyndonkam ïa ka kyndon 7 kum u kuli politik da ka jingthmu ban pyniap ïa ka bor bad iktiar jong ki Syiem” ula ong.
Ula buh jingkylli ruh ïa ka rukom shim rai da ka Council. “Ka jingsospon ïa u Ainam Manik Syiem la leh khlem kano kano ka jingtohkit ba laitluid lane ka jingbishar ba khlem shah liang. Kam shym don satia kano kano ka bor bym shah liang ba la pynkupbor ban shong bishar hok ïa ki jingkynnoh. Ka KHADC ka leh ïalade kum ka nongujor, ka nongpynngat, ka nongbishar bad ka nongpyntreikam ïa ka hukum ha kajuh ka por. Kane kam dei ka jingleh hok. Kane ka dei ka jingleh politik kaba la pynbeit lypa ban weng ïa ki Khlieh Nongsynshar lyngba ka rukom treikam” ong u Bah Sainkupar.
