Ujor ka HYC sha ka DGP, BCCI ba shah leh kynhlein ki thei ialehkai Cricket ha u Coach

Shillong, Jymmang 26 : Ka Hynniewtrep Youth Council (HYC) ka la aiti ïa ka jingujor sha ka Director General of Police (DGP) ka Jylla bad sha ka Board of Control for Cricket in India (BCCI) ba dawa ban tuklar halor ka jingkynnoh shah leh kynshleiñ ki thei ïalehkai cricket ka Jylla ha u Coach bad Manager bad ka bynta ba la leh da ki nongkitkam ka Meghalaya Cricket Association.
Ha ka kyrwoh ba pynlait ha ka sngi Ba-ar, ka HYC ka la ong ba kane ka kam ka la wan hapoh ka jingpeit jong ka State Women Commission, hynrei “ka jingkhia jong ki jingkynnoh ka dawa ïa ka jingleh eiei ba kyrkieh, kaba hok bad ka laitluid na baroh ki bor pyntreikam ïa ka aiñ bad ka bor pynïaid ïa ka Cricket”.
Ha ka ujor sha ka DGP, ka Council ka la dawa “ïa ka jingtohkit ba mardor, ban reigister ïa ka FIR, ai jingïada ïa ki nongujor bad ki nongsakhi, bad ban leh eiei kat kum ka aiñ ïa ki briew kiba donkti”.
Ha ka ujor sha ka BCCI, ka HYC ka la kyntu ba “kan pynlong ïa ka jingtohkit ba laitluid, shong bishar ïa ka jingkitkhlieh jong ki nongkitkam ka MCA, pynthikna ban ai jingïada ïa ki thei ïalehkai ba shah ktah, bad ban pynkhlaiñ ïa ki aiñ bad pynbeit ïa ki jingeh hapoh ka jylli ïalehkai cricket.”
Ka HYC kala dawa ïa ki bor khmih ba kin leh ei ei noh mardor, kaba shai bad ka bym shah liang ban pynksan ïa ka hok bad ïada ïa ka burom jong ka kynhun ïalehkai.