Haduh 40 metre jrong ka jingkieng ïit ba 51 klur ha Dympep, ka jingtei ba phylla tam ha NE

Shillong, Jymmang 25 : Ka Jingkieng ïit ba la shna kyrpang na ka bynta ki nongïaid kai pyngad lane ka skywalk kaba la ïaid shaid shaid mynta ha Dympep ba don harum Mawkdok – Dympep ka jrong haduh kumba 40 mitar nalor ka jingïar ba 7 mitar bad kan sa kylla long ruh kawei na ki jaka ïaid kai kaba phylla tam ha ka thain shatei lam-mihngi jong ka Ri bad kumjuh ha ka Ri baroh kawei, ong u MLA ka Sohra, Bah Gavin Mylliem.
Ïa kane ka jingkieng ïit ka sorkar kaba la mang haduh 51 klur tam, u MLA u la pyntip ba ki la buh thong ban pyndep noh ïa ka ha ki bynta ba khatduh jong u snem 2027.
Shuh shuh u ong ruh ba ynda la dep kane ka jingtei kan sa kylla long kawei na ki jaka jngohkai pyrthei kaba baroh kin sa kwah lut ban wan ïuhkjat bad peitkai.
“Ïa kane ka skywalk kaba ka jingtrei ka la ïaid shaid shaid bad poi mynta kumba 20 persen la khmih lynti ban pyndep noh ha ki bynta ba khatduh jong u snem 2027 bad ka thong jong ka ka long ban kyntiew ïa ka jingïawan jong ki nongjngohkai sha ka thaiñ bad ki jaka ba marjan,” u la ong haba kren bad ki lad pathai khubor.
Kumban shu kdew hangne, u Myntri Rangbah ha ka jingïalang jong ka CM Connect kaba long ha u snem ba la dep ha Mawkdok u la ïathuh ba nalor kane ka skywalk kin don ruh ki jaka bam, ki dukan kiban pynïaid hi da ki trai shnong nalor kiwei kiwei ki jingdonkam kiba ïadei na ka bynta ki paidbah nongwan kai nalor ka jaka ieng kali kaba biang.
Ha kajuh ka por u MLA u la pyntip ruh ba ïa ka projek jngohkai pyrthei ha Nohkalikai kaba hapoh ka PM-Devine scheme la mynjur ha u Naiwieng jong u snem ba la dep ha ka jingmang kaba kot kumba 38 klur bad shen yn sa sdang trei noh ïa ka ha kine ki khyndiat sngi ban wan.